Мақтаарал мен Жетісайды дамыту жолдарын талқыладық

Облысымыздағы халық тығыз шоғырланған шалғай аудандар - Жетісай мен Мақтаарал аудандарына іссапармен бардым. Мақта алқаптары мен мақта зауыттарында, кәсіпорындарда болдым. Мақта өсірушілермен кездесіп, осы саладағы мәселелерді талқыладық.
Бірқатар шаруа қожалықтары мен кәсіпорындардың жұмысымен танысып, тұрғындарға «Ауыл аманаты» жобасының тиімділігін түсіндірдік. Әлеуметтік жағдайы төмен отбасыларға мемлекеттік жәрдемақылар, әлеуметтік көмектер қарастырылғанымен, ол мәселені толық шешпейді. Адам өзі жұмыс істеп, кәсіппен шұғылданбай, іс өнбейтіні анық. Бұл ретте «Ауыл аманаты» жобасының берері көп. Осы жоба арқылы несие алып, іс бастаған кәсіп иелері өз жетістіктерімен бөлісті.
Мемлекет басшысы Қасым-Жомарт Тоқаев биылғы Жолдауында су көздерін үнемдеу мәселесін көтерді. Бұл – біздің өңір үшін аса маңызды. Сондықтан суды үнемдейтін әдістерге басымдық берген жөн. Ауыл шаруашылығы тауарларын шығарып қана қоймай, оны терең өңдеуге көшу керек. Ауыл тұрғындары, жастары «Ауыл аманаты» жобасы арқылы жеңілдетілген несие алып, жұмыс істесе болады. Оған толық мүмкіндік бар. 
Мақтаарал ауданы мақта өсіретін жалғыз өңір болғандықтан, мақта кластерін дамытуға күш салынып отыр. Біз үшін бұл бағытты барынша дамыту, халықаралық нарыққа шығу маңызды. Өңірде мақта-тоқыма кластерін салу жобасы әзірленді. Ол толық іске асырылған жағдайда өңірде зауыт, кәсіпорын және фабрикалар салу есебінен 9 мақта тоқыма кластері құрылады. Нәтижесінде 40 мыңнан астам жаңа жұмыс орны ашылмақ. 
Осы орайда Өзбекстанмен екіжақты ынтымақтастықты дамыту шеңберінде «Global Textile» компаниясымен тоқыма кластерін құру жөніндегі бірлескен жоба іске асырылуда. Компания облыста тоқыма бұйымдарын өндіруді жолға қоюға ниетті.
Түркияның мақта тұқымын өндіруші ірі компанияларымен жүргізілген келіссөздер нәтижесінде 1 мың тонна элиталық тұқым жеткізу туралы уағдаластыққа қол жеткізілді. «Наманган – 77» тұқымдық шиті сынама ретінде егілді. Сапа артпай, сұраныс өспейді. Сондықтан болашақта мемлекет қызметі белгіленген стандарттарға сәйкес келетін фермерлік шаруашылықтарға ғана қолдау көрсетеді.

• 04.10.2023
• 204