Құрметті білім беру саласының қызметкерлері!

Құрметті білім беру саласының қызметкерлері!
Ұлағатты ұстаздар! 

Сіздерді 5 қазан – Ұстаздар күнімен шын жүректен құттықтаймын!  Ұстаз – ұлағатты есім. Мемлекет басшысы Қасым-Жомарт Тоқаевтың биылғы Қазақстан халқына Жолдауында «Әділетті Қазақстанды құру ісінде мұғалімдердің рөлі айрықша екені сөзсіз. Мемлекетімізде соңғы жылдары ұстаз мамандығының абырой-беделін арттыру үшін көп жұмыс жасалды» деп мұғалімдердің қоғамдағы орны ерекше екенін атап өтті. Сондықтан ел тізгінін ұстайтын, еліне жанашыр, білімді, тәрбиелі, жан-жақты, саналы ұрпақ тәрбиелеуде ұстаздардың еңбегі орасан зор. 

Қазақтың қаһарман батыры Бауыржан Момышұлы «Ұстаздық – ұлық емес, ұлы қызмет» деп айтқандай, сіздерге артылатын жауапкершілік жоғары. Мұғалімдер білімді, әділ, өнегелі, сабырлы, отангшыл болса, шәкірттері де сол ізгі қасиеттерді бойларына сіңіреді. Болашақта елге тұтқа болатын азаматтарды білім нәрімен сусындатып,  тұлға болып қалыптасуы жолындағы жанкешті еңбектеріңізге алғысымды білдіремін. 
Демографиялық өсімі жоғары Түркістан облысында жыл сайын жаңа білім ұялары салынып, білікті мұғалімдермен толығып жатыр. Айта кетейік, Түркістан облысында педагогика саласында 82 мыңға жуық адам қызмет атқаруда. Оның 64 983 педагогі орта білім саласында қызмет етіп жүр. Білім саласын қолдау бағытындағы жүйелі жұмыс жалғасады. 

Ардақты ұстаздар!  
Бәріміз де ұстаздан тәлім алдық, үлкен өмірге қадам бастық. Сондықтан сіздердің еңбектеріңізді жақсы білеміз және құрметтейміз. Отбасыларыңызға амандық, дендеріңізге саулық, ел болашағын қалыптастырудағы жұмыстарыңызға табыс тілеймін!

• 07.10.2023
• 185