Түркістанға Түркі әлемінің туристік астанасы мәртебесі беріледі

Құрметті жерлестер! 
Бүгін ғана бауырлас Түркия, Әзербайжан, Мажарстан, Қырғызстан және Өзбекстан елдерінің қатысуымен Түркі елдері ұйымының форумы басталды. Жиында Түркістан қаласына 2024 жылға «Түркі әлемінің туристік астанасы» мәртебесін беру жайы көтерілді. 
Бұл – өңірдің одан әрі дамып, туристік әлеуетінің артуына оң серпін беретін қадам деп білемін. Түркістанның мұндай маңызды міндетті алуы – түркітілдес бауырлардың ыстық ықыласы деп түсінемін. Қазақ хандығының астанасы атанған қаланың жауһарына айналған Қожа Ахмет Ясауи кесенесі мен басқа да ежелгі нысандар туристердің Түркістанға деген қызығушылығын арттырады. Алдағы уақытта да Түркістан тек еліміздің ғана емес, Түркі әлемінің рухани шамшырағы ретінде жарқырайтын болады. 
Баршаңызды Түркістан облысының құрылғанына 5 жыл толуымен шын жүрекпен құттықтаймын! Осы мерекеге арналған бүгінгі өткен өнер кеші – қала тұрғындары мен қонақтарына тамаша тарту болды. Қазіргі таңда Мемлекет басшысы Қасым-Жомарт Тоқаевтың бастамасымен Түркістанға ерекше мәртебе беру бағытында жұмыстар жүргізіліп жатыр. Айтулы мереке қарсаңындағы өнер кеші сіздерге рухани демалыс сыйлады деп сенемін.

• 13.10.2023
• 207