Агенттіктің Халықаралық валюта қоры мен Дүниежүзілік банктің Жыл сайынғы кездесулеріне қатысуы туралы

2023 жылғы 12-14 қазан аралығында ҚР Қаржы нарығын реттеу және дамыту агенттігінің делегациясы Халықаралық Валюта Қоры мен Дүниежүзілік банктің жыл сайынғы кездесулеріне қатысты.

Іс-шара шеңберінде Халықаралық валюта қорының (ХВҚ), Дүниежүзілік банктің, Халықаралық қаржы корпорациясының (IFC), S&P, Fitch және Moody’s рейтингтік агенттіктерінің басшылығымен және қызметкерлерімен кездесулер өткізілді.

ХВҚ-мен және Дүниежүзілік банкпен кездесулер барысында қаржы секторының тұрақтылығын және дамуын қамтамасыз ету жөнінде Қаржы секторын бағалау бағдарламасының (FSAP) қорытындысы талқыланды. Бұдан басқа, Агенттіктің FSAP бағдарламасының ұсынымдарын іске асыру жөніндегі шаралары, оның ішінде Агенттік әзірлейтін төлемге қабілетсіз банктерді реттеу жөніндегі заң жобасы, сондай-ақ Агенттік іске асыратын шоғырландырылған қадағалауды күшейту, байланысты тараптармен мәмілелерді қатаңдату және пруденциялық нормативтерді Базель стандарттарына сәйкес келтіру жөніндегі шаралар талқыланды.

Сондай-ақ, Еуропа Қайта құру және Даму банкінің (ЕҚДБ) «Women Entrepreneurs Finance Initiative/We-FI Code» әйел кәсіпкерлерді қаржыландыру жөніндегі жаңа бастамасын іске қосуға қатысты. Бұл пилоттық жоба кәсіпкер әйелдерді қолдауды, олардың бизнесін дамыту үшін қаржы өнімдері мен көрсетілетін қызметтерге қолжетімділігін арттыруды көздейді. Қазақстан We-Fi Code бастамасына қатысушы 13 пилоттық елдің бірі болды.

• 01.11.2023
• 133