Еуразиялық үкіметаралық кеңес кооперациялық жобаларды іріктеу және оларға қаржылай көмек көрсету қағидаларын бекітті

Бішкекте Еуразиялық үкіметаралық кеңестің отырысында ЕАЭО елдері үкіметтерінің басшылары өнеркәсіп салаларында бірлескен кооперациялық жобаларды іріктеу және оларды ЕАЭО – ға мүше мемлекеттердің іске асыруы кезінде қаржылық көмек көрсету туралы ережені бекітті.

Бұл құжат ЕАЭО бюджетінен қаржылық көмек алу үшін бірлескен кооперациялық өнеркәсіптік жобаларды іріктеу тәртібін және шарттарын көздейді.

Осылайша, қаржыландыру кооперациялық жобаларды іске асыруға банктер беретін кредиттер мен қарыздар бойынша пайыздық мөлшерлемені субсидиялау жолымен жүзеге асырылатын болады.

ЕАЭО-ға мүше мемлекеттердің кәсіпорындары үшін бұл қаржыландыру тетігі ЕАЭО шеңберінде өнеркәсіптік кооперацияны одан әрі дамытуды және жаңа жоғары технологиялық өндірістерді енгізуді қамтамасыз ететін қандай да бір «жеңілдетілген несие» болып табылады.

Жобаларды іріктеу критерийлері негізгі шарттардын бірі үш және одан да көп мүше мемлекеттердің кәсіпорындарының қатысуы болып табылады.

Сондай-ақ, Ережеге сәйкес жоба жаңа кәсіпорын құру немесе оны жаңғырту, қосылған құн тізбегін қалыптастыру, экспортты ұлғайту, сауда немесе инвестиция көлемін ұлғайту сияқты бір немесе бірнеше маңызды нәтижелерге қол жеткізуге бағытталуы тиіс. Ал кәсіпкерлер жобаны бес жыл мерзімде іске асыруы тиіс.

Субсидияның ең жоғары сомасы жыл ішінде бір жобаға шамамен 2 млрд. теңгені құрайтынын атап өту маңызды.

Айта кетейік, кооперациялық жобаларды іріктеу кооперациялық ынтымақтастықтың аса маңызды түрлерін негізге ала отырып, ұпайлық жүйе бойынша жүзеге асырылатын болады. Мысалы, материалдарды, жиынтықтауыштарды және (немесе) жабдықтарды жеткізу үшін 100 ұпай, технологиялық жабдықты немесе бағдарламалық қамтамасыз етуді жеткізу үшін – 80 ұпай, инжинирингтік және құрылыс қызметтерін көрсету үшін – 50 ұпай, жобаны іске асыруға оның құнының кемінде 10 пайызы сомасына мүліктік жарна енгізу үшін – 20 ұпай көзделген.

Бұдан басқа, 4 және 5 мүше мемлекеттерден шаруашылық жүргізуші субъектілердің кооперациялық жобасына қатысу, ЕАЭО-ға мүше мемлекеттердің кәсіпорындары бұрын өндірмеген өнім өндіру, жаңа жұмыс орындарын құру және үшінші елдерге өнім экспортын ұлғайтуды қамтамасыз ету кезінде қосымша ұпай есептеу көзделеді.

Осылайша, Комиссия ЕАЭО-ға мүше мемлекеттердің сарапшыларымен бірлесіп жылына екі рет көрсетілген критерийлерге сәйкес келетін және ең көп ұпай жинаған кооперациялық жобалардың тізбесін қалыптастыратын болады.

Кейіннен кооперациялық өнеркәсіптік жобаны мақұлдау және қаржы ұйымына субсидия беру туралы қорытынды шешімді Комиссия Кеңесі қабылдайтын болады.

Қаржылық жәрдемдесудің жаңа тетігін 2024 жылы ЕАЭО туралы шартқа өзгерістер енгізу туралы Хаттама күшіне енген күннен бастап іске қосу жоспарлануда

• 06.11.2023
• 160