С. Жақыпова Павлодар облысы кәсіпорындарының қызметкерлеріне әлеуметтік қорғаудың жаңа шаралары туралы хабарлады

ҚР Еңбек және халықты әлеуметтік қорғау министрі Светлана Жақыпова Павлодарға жұмыс сапары аясында өнеркәсіп кәсіпорындарының қызметкерлерімен кездесу өткізді. Еңбекминінің басшысы еңбек ұжымдарымен өндірістегі еңбек қауіпсіздігі мен еңбекті қорғауды қамтамасыз ету мәселелерін талқылады және зиянды еңбек жағдайларында ұзақ уақыт жұмыс істейтін азаматтарға 55 жастан бастап зейнеткерлік жасқа толғанға дейін арнайы әлеуметтік төлем тағайындаудың негізгі тәсілдері туралы айтты.

Кездесу Павлодар алюминий зауытында өтті. Іс-шараға ҚР Еңбекмині Еңбек және әлеуметтік қорғау комитетінің төрағасы – Қазақстанның Бас мемлекеттік еңбек инспекторы Төлеген Оспанқұлов, өңірдегі өнеркәсіп кәсіпорындарының 180 қызметкері, жергілікті және республикалық БАҚ өкілдері қатысты.

Светлана Жақыпова өз сөзінде бұл кездесу Мемлекет басшысының 2023 жылғы 1 қыркүйектегі Қазақстан халқына Жолдауында айтылған 2030 жылға дейінгі қауіпсіз еңбек тұжырымдамасын, сондай-ақ зиянды еңбек жағдайларында ұзақ уақыт бойы жұмыс істейтін адамдарды әлеуметтік қолдау тетігін әзірлеу жөніндегі тапсырмаларын іске асыру бойынша жүргізілген жұмысты түсіндіру мақсатында өткізіліп жатқанын атап өтті.

«Өндірістік жарақаттану деңгейін төмендету мақсатында 2030 жылға дейінгі қауіпсіз еңбек тұжырымдамасының жобасы әзірленді. Атап айтқанда, жұмыс орнында кәсіптік тәуекелдерді бағалаудың жаңа моделін енгізу, кәсіптік тәуекел дәрежесі бойынша сақтандыру тарифін саралау, Кәсіпорындардың цифрлық картасын құру және еңбекті қорғау саласында мемлекеттік бақылау мен мониторингтің проактивті форматын енгізу және т.б. ұсынылады», – деді министр.

Сондай-ақ, Светлана Жақыпова Министрлік зиянды еңбек жағдайларында жұмыс істейтін адамдарды әлеуметтік қорғау деңгейін арттыру тәсілдерін әзірлеп, мүдделі мемлекеттік органдармен келіскенін хабарлады. Азаматтардың осы санаты үшін арнайы әлеуметтік төлем енгізу қарастырылады.

«Арнайы әлеуметтік төлемдер 55 жасқа толған және 7 жыл бойы міндетті кәсіптік зейнетақы жарналары бар, зиянды еңбек жағдайларында жұмыс істейтін жұмыскерлерге тағайындалады деген шешім қабылданды.

Арнайы әлеуметтік төлемдер төрт көзден: республикалық бюджеттен 1,5 ең төмен күнкөріс деңгейі мөлшерінде; Үкімет қаулысымен бекітілген тәртіппен БЖЗҚ-дан міндетті кәсіптік зейнетақы жарналары мен жинақталған зейнетақы жинақтарын ескере отырып, міндетті зейнетақы жарналары есебінен; өмірді сақтандыру жөніндегі компаниялардан 1 ең төмен күнкөріс деңгейі мөлшерінде; жұмыс берушілердің қаражаты 1 ең төмен күнкөріс мөлшерінде жүзеге асырылатын болады», – деді Еңбекминінің басшысы.

Министр заңнамаға енгізілген түзетулердің тиісті жобасы ҚР Парламенті Мәжілісінің қарауында екенін атап өтті.

Кездесу барысында Светлана Жақыпова Павлодар облысы кәсіпорындары қызметкерлерінің сұрақтарына жауап беріп, БАҚ-қа сұхбат берді.

• 08.11.2023
• 165