Түркістан өңіріндегі көкөніс сақтау қоймасы салынады

ҚР Премьер-министрінің орынбасары Серік Жұманғаринмен бірге көкөніс сақтайтын заманауи қойманың капсуласын салдық. Жоба «Түркістан» әлеуметтік-кәсіпкерлік корпорациясы арқылы жүзеге аспақ. Қойма келесі жылы ел игілігіне тапсырылады. Сауран ауданы аумағындағы бұл қоймада жылына 4 мың тонна көкөністер сақталады. Жаңа жұмыс орындары ашылады. Бұл өндіріс аймағында өндіріс саласында жүзеге асырылып жатқан басқа да жобалар бар.  
Бұдан бөлек, астаналық делегациямен бірге өңіріміздің бизнес қауымдастығымен кездестік. Ашық диалог алаңында отандық өнім өндіру мен жергілікті тауар өндірушілерді қолдау шаралары мен өңдеу салаларының дамуы туралы мәселелерді жан-жақты талқыладық. Инвесторлар түрлі бағыттағы жобаларын таныстырды. Мақта өңдеу және ауыл шаруашылығы саласында жүзеге асатын бірқатар жобалар жайлы айтылды. Мемлекет тарапынан көрсетілген қолдаулар үшін алғыс білдірді. 
Өңірге инвестиция тарту мақсатында ірі жобалар іске асырылуда. Мәселен, Келес ауданындағы ірі жылыжайдың жобасы арқылы күнбағыс өндірісін дамытуға күш салынбақ. Сонымен қатар Түркістан облысында еліміздегі ең ірі мұнай зауыты салынып жатыр. Келесі жылы іске қосылмақ. Бұдан бөлек, өңірде «Өгем өзенінде су электр станцияларының каскады» салынуда. Аталған жоба іске асқан жағдайда облыстың оңтүстігіндегі тұрғындар түбегейлі ауыз сумен толық қамтамасыз етіледі. Облыста химиялық кешен салынып, көмір-химия комбинаты іске қосылмақ. Жаңа зауытта 1 мың жұмыс орны құрылады.  
Біздің мақсат – жаңа өндіріс орындары мен кәсіпорындар ашу арқылы жұмыс орындарын көбейту. Отандық өнімді молайту, кіріс көлемін арттыру. Бюджетке ғана сенім артпай, жаңа жобаларды жүзеге асырған жөн. Бұл ретте инвестицияның маңызы зор. Сондықтан біз инвесторларға әрқашан ашықпыз және бірлесе жұмыс істеуге, қолдауға дайынбыз. Түркістан облысының республиканың басқа өңірлерімен ерекшелігі – күннің ыстық және жылы күндерінің ұзақ болуында.
Түркістан облысында инвесторлар үшін барлық жағдай қарастырылған. Арнайы инвестициялық алаңдары бар. Мұнда кәсіпкерлерге түрлі салықтық жеңілдіктер мен преференциялар қарастырылған. Инфрақұрылым мәселелері бойынша да барынша қолдау көрсетіледі.

• 09.11.2023
• 257