С. Жақыпова ЕО-ның Қазақстандағы елшісі К. Янкаускаспен кездесті

ҚР Еңбек және халықты әлеуметтік қорғау министрі Светлана Жақыпова Еуропалық Одақтың Қазақстандағы Елшісі Кестутис Янкаускаспен кездесті. Диалог барысында ЕО-ның әлеуметтік қорғау, еңбек және жұмыспен қамту мәселелері жөніндегі сараптама орталығымен (бұдан әрі – SOCIEUX+) ынтымақтастық мүмкіндіктері талқыланды.

Кездесуді ашқан Еңбекминінің басшысы Қазақстанның стратегиялық серіктестерінің бірі ретінде Еуропалық одақпен ынтымақтастықтың маңызын, сондай-ақ жан-жақты өзара іс-қимылды одан әрі дамытудың маңыздылығын атап өтті.

Министр ведомствоның қазақстандықтардың әл-ауқатын жақсарту бойынша жүргізіп жатқан жұмысы туралы, сондай-ақ қызметтің қысқа мерзімді және орта мерзімді басымдықтары туралы баяндады.

Бұдан басқа, Светлана Жақыпова ҚР Әлеуметтік кодексінің қабылдануы және оның негізгі ережелері, 2024 – 2029 жылдарға арналған еңбек нарығын дамыту тұжырымдамасының жобасын әзірлеу, 2023 – 2027 жылдарға арналған көші-қон саясатының тұжырымдамасын қабылдау және басқа да жетістіктер туралы егжей-тегжейлі айтып берді.

Өз кезегінде Кестутис Янкаускас SOCIEUX+ қызметінің ерекшеліктері, ҚР Еңбек және халықты әлеуметтік қорғау министрлігімен, жұмыс берушілер қауымдастықтарымен және кәсіптік одақтармен ынтымақтастықтың мүмкіндіктері мен перспективалары туралы айтты.

Кездесу соңында, тараптар ведомство мен SOCIEUX+-тің өзара іс-қимылын одан әрі дамыту мүмкіндіктерін талқылады.

• 21.11.2023
• 183