С. Жақыпова БҰҰ БЖКБ Орталық Азия бойынша өкілі Х. Шоддермен кездесті

ҚР Еңбек және халықты әлеуметтік қорғау министрі Светлана Жақыпова БҰҰ-ның Босқындар істері жөніндегі Жоғарғы комиссары Басқармасының (бұдан әрі – БЖКБ) Орталық Азия бойынша Өкілі Ханс Шоддермен кездесу өткізді, кездесу барысында босқындар мен пана іздеушілердің құқықтарын қорғауға қатысты өзекті мәселелер талқыланды.

Светлана Жақыпова БЖКБ-ға пана іздеушілер мен босқындар мәселелері бойынша қатынастарды реттеу саласындағы жемісті ынтымақтастығы үшін алғыс білдірді.

«Өздеріңіз білетіндей, біз Қазақстанның босқындарға қатысты қабылдаған халықаралық міндеттемелерін имплементациялау бойынша жұмыс жүргізудеміз. Босқындарды медициналық және әлеуметтік көмек алуға, жұмысқа орналасуға, білім алуға қолжетімділікті қамтамасыз ету бойынша бірқатар тиісті ұсыныстар әзірледік. Бұл ұсыныстарды біз көші-қон процестерін жетілдіру жөніндегі арнайы комиссияда қарадық», – деп атап өтті министр.

Өз кезегінде Ханс Шоддер Қазақстан Үкіметінің босқындар мен пана іздеушілерге көмек көрсету мәселелерін пысықтау бөлігінде қол жеткізген оң нәтижелерін атап өтті, сондай-ақ одан әрі ынтымақтастыққа дайын екенін білдірді.

• 07.12.2023
• 221