Қазақстан Республикасы Еңбек және халықты әлеуметтік қорғау министрі Т.Қ. Дүйсенованың Көктем мейрамымен құттықтау сөзі

Қадірлі қазақстандықтар!

Міне, қылышын сүйреткен қаһарлы қыстың орнын, жаңару мен жаңғыру мезгілі көктем қайта басты.

Дәл осы сәтте, арулардың мерейлі мейрамы – Халықаралық әйелдер күнін атап өтетініміз де көңілге қуаныш ұялатады. Себебі, нәзік жандар қауымы арқалаған жүктің жауапкершілігі зор, салмағы ерен. Бұл замандастарымыз өмірдің барлық саласына белсене араласып, ерлермен қатар қыр-cыры күрделі мамандықтарды игере білуде. Осы орайда ең таңғажайып тұсы сол, әйелдер жағы жұмысын толық беріліп атқарып қана қоймай, отбасы – ошақ қасында жақындарына махаббат пен үміт, жылулық пен жасампаздық қуатын сыйлауда. 

Елбасы Нұрсұлтан Әбішұлы Назарбаев та әйел адамның отбасы ұйытқысы екенін, яғни тұтас мемлекеттің сенімді тіреуі екенін үнемі айтып келеді.

Расында қазақ халқы қыз балаларын барша жұртпен тең ұстап, ардақты ана атын аса қамқорлықпен аялаудан жаңылған емес.

Қымбатты апа-қарындас, қатарлас-құрбылар, жалпы әйелдер қауымы шын жүректен осы бір ерекше мейраммен құттықтауымды қабыл алыңыздар! Сіздерге мықты денсаулық, ырыс-береке және мол бақыт тілеймін! Лайым көктемнің көрікті күні жақындарыңыз жан-жақтан бөлеп тастайтын ізгі ниеттердің ортасында шалқып жүре беріңіздер!

Ежелден келе жатқан шежірелі төл мейрамымыз Наурыздан да күтеріміз көп! Өйткені еліміз үшін негізін бейбітшілік пен келісім, жақсылық пен мейірімділік сияқты ұғымдар құраған бұл мерекенің халқымыз үшін маңызы шексіз.

Наурыз мейрамы әр шаңыраққа молшылық пен бақыт, қуаныш әкелсін!

Барша қазақстандықтарға ашық аспан, қажымас қайрат, аста-төк табыс, сарқылмас шабыт тілеймін!

Қазақстан Республикасының

еңбек және халықты әлеуметтік қорғау министрі

Тамара Дүйсенова

• 07.03.2017
• 11756