С. Жақыпова қазақстандықтарды Тәуелсіздік күнімен құттықтады

ҚР Еңбек және халықты әлеуметтік қорғау министрі Светлана Жақыпова қазақстандықтарды Қазақстан Республикасының Тәуелсіздік күнімен құттықтап, мықты денсаулық, амандық пен бақыт тіледі.

 «Биыл біз маңызды тарихи оқиғаны – Қазақстанның егемендік алғанына 32 жыл толуын атап өтеміз.

Тәуелсіздік – біздің ата-бабаларымыз ежелден бері армандаған асыл мұрат. Егемендік алған Қазақстан өзінің мемлекеттік рәміздерін және төл  валютасын енгізді, негізгі заңымыз  – Конституциямыз қабылданып,  еліміз демократиялық, зайырлы, құқықтық және әлеуметтік мемлекет болып жарияланды, даңғыл даму жолына түсті.

Тәуелсіздіктің алғашқы жылдарында тұтас дәуірдің куәгері болған халқымыз айтарлықтай қиындықтарды бастан кешірген еді, өйткені бұрынғы Одақ кезіндегі сауда-экономикалық байланыстардың үзілуінен көптеген кәсіпорындардың жұмысы тоқтады, жалақы бойынша берешек пен жұмыссыздық деңгейі өсті, халықтың табысы төмендеді.

Алайда, осыған қарамастан, мемлекет ұзақ мерзімді әлеуметтік басымдықтарды айқындады. Тәуелсіздік жылдарында әлеуметтік-еңбек саласында ауқымды жұмыстар атқарылды, барлық салалық заңдар, стратегиялық құжаттар мен мемлекеттік бағдарламалар қабылданды.

Әлеуметтік міндеттемелерді орындау және халықтың әл-ауқатын арттыру еліміздің әлеуметтік саясатының негізгі басымдықтары болып табылады.

Бүгінгі күні республикалық бюджет қаражаты есебінен базалық және ынтымақты зейнетақыны қоса алғанда, әлеуметтік төлемдердің 41 түрі жүзеге асырылады. Жыл басынан бері 4,3 млн адамға, оның ішінде 2,3 млн зейнеткер мен 2 млн мемлекеттік жәрдемақы алушыға жәрдемақылар мен зейнетақылар төлеуге 4,2 трлн теңге жұмсалды.

Биыл Әлеуметтік кодекс қабылданып, 1 шілдеден бастап күшіне енді. Бұл ТМД аумағындағы әлеуметтік қамсыздандыру саласындағы заңнаманы шоғырландырған және азаматтардың туғаннан бастап қартайғанға дейінгі құқықтарына кепілдік беретін алғашқы құжат.

Мемлекет басшысының тапсырмалары мен Әлеуметтік кодексті іске асыру аясында халықтың әртүрлі санаттары үшін әлеуметтік қолдау шаралары айтарлықтай күшейтілгенін атап өту қажет. Арнаулы әлеуметтік қызметтер көрсету жүйесін трансформациялау бойынша жұмыс басталды.

Жұмыспен қамтуға жәрдемдесу шараларының кешенін іске асыру жұмыссыздық деңгейін 4,7% - ға дейін төмендетуге ықпал етті. Жыл басынан бастап 908,5 мыңнан астам адам жұмысқа орналастырылды, оқыту және кәсіптік бағдар беру түрінде халықты жұмыспен қамтуға жәрдемдесудің қосымша шараларымен 311,1 мыңға жуық қазақстандық қамтылды.

Барша қазақстандықтарды Тәуелсіздік күнімен құттықтаймын! Отандастарымызға зор денсаулық, амандық пен бақыт,  туған еліміздің одан әрі гүлденуін тілеймін!» – делінген Светлана Жақыпованың мерекелік үндеуінде.

• 15.12.2023
• 214