Көлік министрлігінде жаңа құрамдағы қоғамдық кеңестің отырысы өтті

ҚР Көлік министрлігінің жанынан қоғамдық маңызы бар мәселелер бойынша азаматтардың пікірін ескеру және ведомство қызметіне деген сенімін арттыру мақсатында Қоғамдық кеңес құрылып, құрамына 15 адам кірді.

Отырыстың күн тәртібі туралы баяндамамен қоғамдық кеңесті қалыптастыру жөніндегі жұмыс тобының жетекшісі Жамалбек Қаржау сөз сөйледі.

«Қызығушылық танытқан үміткерлердің қарасы қалың. Десе де орындар саны шектеуліболғандықтан, таңдау қажет болды. Жұмыс тобы бір айдың ішінде 34 үміткердің құжаттарын қарап, олардың әрқайсысымен әңгімелесу өткізді», – деді ол.

Қоғамдық кеңестің бірінші отырысында жаңа құрамдағы кеңестің төрағасы сайланды. Сонымен бірге кеңес туралы ереже бекітіліп, ұйымдастыру мәселелері қаралды. Ұйымның жаңадан сайланған басшысы кеңес қатысушыларына жұмыс жоспарын әзірлеуді және министрлік қызметінің бағыттары бойынша салалық комиссиялар құруды ұсынды.

«Біз бірлесе отырып, түрлі мәселелер бойынша азаматтық қоғамның пікірін білдіру үшін нақты қоғамдық институт пен сындарлы диалог алаңын құра аламыз деп үміттенемін. Сондай-ақ азаматтық авиация, теміржол және су көлігі, автокөлік, автомобиль жолдары және сыбайлас жемқорлыққа қарсы іс-қимыл мәселелері бойынша 5 комиссия құруды ұсынамын», – деді Берік Камалиев.

Министрлік Аппаратының басшысы кеңестің бұрынғы құрамына алғысын білдіріп, атқарған жұмыстары туралы есеп берді.

«Жылдың басынан бастап Қоғамдық кеңес 11 отырыс өткізіп, министрлік өкілдерінің 20-дан астам мәселе бойынша есептері тыңдалды. Сондай-ақ министрлік әзірлеген 465 нормативтік-құқықтық акті қаралды», – деп атап өтті Ерболат Мұқаев.

Жоспар бойынша Қоғамдық кеңестің келесі отырысында салалық комиссиялардың құрамы анықталатын болады.

• 22.12.2023
• 188