С. Жақыпова Өзбекстанның Қазақстандағы елшісі С. Ниязходжаевпен кездесті

ҚР Еңбек және халықты әлеуметтік қорғау министрі Светлана Жақыпова Өзбекстан Республикасының Қазақстан Республикасындағы Төтенше және Өкілетті елшісі Саидикром Ниязходжаевпен кездесу өткізіп, оның барысында екіжақты ынтымақтастық мәселелері талқыланды.

Кездесуді ашқан Еңбекминінің басшысы Қазақстан-Өзбекстан үкіметаралық комиссиясының маңызды рөлін атап өтті, соның арқасында ынтымақтастықтың перспективалық бағыттары айқындалады, проблемалық мәселелер шешіледі, елдеріміздің іскер топтары арасында тікелей байланыстар орнатылады.

Мәселен, 2023 жылғы мамырда Ташкентте өткен үкіметаралық комиссияның отырысы аясында «Қазақстанда Өзбекстан азаматтары болып табылатын еңбекші мигранттардың және Өзбекстанда Қазақстан азаматтары болып табылатын еңбекші мигранттардың еңбек қызметі және құқықтарын қорғау туралы» 2023 – 2024 жылдарға арналған бірлескен жоспарға қол қойылды. Бірлескен жоспардың іс-шараларын орындау еңбек көші-қоны процесін құқықтық реттеуді қамтамасыз етуге және жалпы алғанда, еңбекші мигранттардың әлеуметтік, экономикалық және өзге де құқықтарын қорғауды қамтамасыз ете отырып, екі мемлекет арасында жұмыс күшін ауыстыру үшін қолайлы жағдайлар жасауға мүмкіндік береді.

Сонымен қатар Министр қазақстандықтардың өмір сүру сапасын жақсарту бойынша ҚР Үкіметі қабылдап жатқан шаралар туралы хабарлады. Светлана Жақыпова өткен жылы қабылданған Әлеуметтік кодекс, Отбасының цифрлық картасы, Еңбек нарығын дамыту тұжырымдамасы, Қандастар мен қоныс аударушыларды бейімдеу және интеграциялау жөніндегі пилоттық жоба және т. б. туралы айтты.

Өз кезегінде, Саидикром Ниязходжаев көрші ел тарапының азаматтарға арналған қазақстандық әлеуметтік бағдарламалар тәжірибесін қабылдауға мүдделі екенін білдірді, сондай-ақ еңбек көші-қоны мәселелерін талқылады.

Келіссөздер соңында тараптар мәселелерді жан-жақты талқылау және ынтымақтастықты одан әрі нығайту үшін басқа да министрліктердің қатысуымен неғұрлым кеңейтілген құрамда кездесу ұйымдастыру қажеттігін атап өтті.

• 19.01.2024
• 195