Көлік министрлігі теңіз инфрақұрылымын дамытудың 2030 жылға дейінгі кешенді жоспарын әзірлеп жатыр

2024 жылы Құрық портының акваториясын тереңдету жүргізіледі, ұқсас шаралар 2025 жылы Ақтауда да жүзеге асырылады деп жоспарланған.

Бұл туралы ҚР Көлік министрлігінің кеңейтілген алқа отырысында ведомство басшысы Марат Қарабаев мәлімдеді.

Сондай-ақ теңіз көлігі саласын дамыту мақсатында «Ляньюньган порт» компанияларымен бірлесіп Ақтау теңіз портында «контейнерлік хабтың» құрылысы басталады. Бұл контейнерлік тасымалдау мүмкіндігін жиырма футтық баламада 300 мыңға дейін арттырады.

Өткізу қабілетін арттыру шеңберінде Ақтау портының айлақтық инфрақұрылымын жаңғырту және Құрықта 3 жаңа терминал салу жоспарланып отыр.

Ақтау және Құрық терминалдарын дамытуға арналған инвестициялардың жалпы көлемі шамамен 6 618 млн құрайды. Көрсетілген шаралар 2030 жылға дейін әзірленіп жатқан теңіз инфрақұрылымын дамытудың кешенді жоспарында ескерілетін болады.

«Биыл сауда флотын дамыту аясында Каспий жағалауында жеке кеме жасау зауытын салу мүмкіндігі зерттеліп жатыр. Жалпы 10 жаңа кеме, оның ішінде 3 танкер, 3 құрғақ жүк және 4 әмбебап паром салу қажеттілігі бар», - деді министр.

Өзен көлігінің әлеуетін толыққанды пайдалану мақсатында министрлік Ертіс трансшекаралық өзенін пайдалана отырып, Ресей Федерациясы – Қазақстан – ҚХР мультимодальды транзиттік дәлізін құруды ұсынады. Бұл көрші мемлекеттерді жаңа көлік қатынасымен байланыстыруға мүмкіндік береді. Мәселені шешу үшін ғылыми-зерттеу институттарымен консультациялар жүргізіледі.

Сонымен қатар Тұғыл кентінің ауданында өзен портын салу және ұзындығы 99 км Тұғыл - Майқапшағай учаскесінде Қытай шекарасына дейін темір жол салу көзделіп отыр.

Перспективалы бағыт бойынша күтілетін тасымалдау көлемі 2-2,5 млн тоннаны құрайды. Жоба сонымен қатар Ресей Федерациясының солтүстік теңіздеріне Обь-Ертіс бассейні арқылы шығу мүмкіндігін қарастырады.

Тағы бір перспективалы жоба Орал-Каспий каналы арқылы экспорттық тасымалдарды қалпына келтіру болып табылады.

«Биыл біз каналдың теңіз бөлігінде тереңдету жұмыстарын бастауды жоспарлап отырмыз. Алдағы екі жылда Орал-Каспий каналының кеме қатынасы параметрлерін қалпына келтіруді жоспарлап отырмыз. Тасымалдаудың әлеуетті көлемі 1 млн тоннаны құрайды. Сондай-ақ Атырау мен Астрахань қалалары арасында екі жақты өзен жүктерін тасымалдауды қалпына келтіру әлеуеті бар», – деп атап өтті М.Қарабаев.

• 23.02.2024
• 239