Қазақстан мен Малайзия электрондық коммерция саласындағы ынтымақтастықты кеңейтуде

2021 жылғы 3 ақпанда ҚР Малайзиядағы Елшілігі онлайн-платформада халал өнімдерімен сауда жасау саласында ҚР Сауда және интеграция министрлігі мен малайзиялық «Aladdin» компаниясы арасында бейнеконференцияны ұйымдастырды.

Іс-шараға ҚР Малайзиядағы Елшісі Б.Иманбаев, Сауда және интеграция вице-министрі А.Жанасова, «QazTrade» сауда саясатын дамыту орталығы» АҚ маркетинг және электронды коммерция департаментінің директоры Ө.Шегірбаев, «Aladdin» компаниясының негізін қалаушы және басшысы Д.То және т.б. қатысты.

Кездесу барысында тараптар электронды сауда, «Aladdin» платформасындағы халал өнімдерінің саудасы, қазақстандық компаниялардың Оңтүстік-Шығыс Азия (ОША) нарығына және малайзиялық компаниялардың Орта Азия және Еуразиялық экономикалық одақ нарықтарына шығу саласындағы өзара әрекеттесу мүмкіндіктерін талқылады. Компания басшылығы электронды сауда және халал индустриясы саласындағы ОША нарығы туралы, «Aladdin»-нің жұмысы, платформадағы сауда-саттық принциптері және тіркеу туралы толық ақпарат берді.

Бейнеконференция нәтижесінде тараптар арасында өзара тиімді ынтымақтастықты дамыту, атап айтқанда, өз тауарларын Оңтүстік-Шығыс Азия нарықтарына шығару үшін қазақстандық компаниялардың тізімін пысықтау, «Aladdin» компаниясын «Астана» халықаралық қаржы орталығының негізінде тіркеу туралы және ҚР Сауда және интеграция министрлігімен ынтымақтастық туралы меморандумға қол қою бойынша келісімдерге қол жеткізілді.

• 05.02.2021
• 212