Құрметті ардагерлер, еліміздің қазыналы қариялары!

Қазақстан Республикасы Еңбек және халықты әлеуметтік қорғау министрлігінің басшылығы мен ұжымы атынан Сіздерді атаулы мерекелеріңізбен шын жүректен құттықтауға рұқсат етіңіздер!

Бағзыдан «Қариялы ел – қазыналы ел» деген дана сөз бар. Қарттарға қамқорлық көрсету – біздің халқымыздың бойына сіңген ежелгі қасиет. Өздеріңіз білесіздер, Тәуелсіздік алғалы Елбасының бастамасымен жүргізіліп жатқан түрлі реформалар халықтың тұрмысын жетілдіріп,  әл-ауқатын жақсартуда.  Жыл сайын мемлекет қарттарға арналған әлеуметтік төлемдерді көтеруде. Әсіресе, саусақпен санарлықтай қатары сиреп бара жатқан, Ұлы Отан соғысы ардагерлеріне айрықша назар аударылуда. 

Үлкенді сыйлау, оларға құрмет көрсету – ата-бабадан келе жатқан салтымыз. Сіздердің өмірлік тәжірибелеріңіз бен ақыл-кеңестеріңіздің, тәлім-тағылымдарыңыздың біз үшін орны бөлек. Себебі, ел еңсесін тіктеуде, талай жыл аянбай тер төктіңіздер. Талай жасты тәрбиелеп, ізбасарларыңызды өсірдіңіздер. Бүгінде, еңбектеріңіздің зейнетін көріп отырған шақта да, Сіздер ұрпақтарыңызға игілік пен ізгіліктің, пайым-парасаттың үлгісін танытудан жалыққан емессіздер. Үнемі бізге ақ баталарыңызбен тілекші болудасыздар. 

Мерекелеріңізбен құттықтай отырып, баршаңызға амандық, отбасы бақытын, мықты денсаулық тілейміз.       

Ізгі ниетпен,

Қазақстан Республикасы

Еңбек және халықты әлеуметтік қорғау министрі                            Т. Дүйсенова

• 01.10.2017
• 8716