Агенттік 2023 жылғы 4-тоқсандағы «Тәуекел жағдайындағы өсу» есебін жариялады

ҚР Қаржы нарығын реттеу және дамыту агенттігі (бұдан әрі – Агенттік) 2023 жылғы 4-тоқсандағы «Тәуекел жағдайындағы өсу» есебін (бұдан әрі –Есеп) дайындады. Есепте әлемдегі және Қазақстандағы негізгі экономикалық оқиғалардың сипаттамасы, сондай-ақ қаржылық жағдайлардың жиынтық индексі (FCI) және оның құрауыштары (ішкі қаржылық жағдайлардың, борыш жүктемесінің, сыртқы сұраныстың және сыртқы қаржылық жағдайлардың индекстері) бойынша жаңартылған есептеулерге негізделген тұжырымдар қамтылады.

Есепте 2023 жылғы 4-тоқсанда ХВҚ санаған жаһандық қаржылық жағдайлардың жеңілдетілгені атап өтілген. Инфляция тезірек баяулады, жаһандық өсу күткеннен де орнықты болды. Осы жағдайлардың аясында және ішкі факторларды ескере отырып, 2023 жылғы 4-тоқсанда Қазақстан экономикасының өсуі 2023 жылғы 3-тоқсандағы 4,5%-дан ж/ж 5,1%-ға ж/ж дейін жеделдеді. ІЖӨ өсуі ауыл шаруашылығын қоспағанда, экономиканың барлық негізгі салаларында өндірістің ұлғаюына, оған қоса инвестициялық және тұтынушылық белсенділіктің жоғары болуына байланысты.

Агенттіктің бағалауы бойынша, 2023 жылғы 4-тоқсанда FCI жиынтық индексі[1] 1,2 тармақтан 0,6 тармаққа дейін төмендеді, бұл алдыңғы тоқсанмен салыстырғанда макроқаржылық жағдайлардың жақсарғанын білдіреді. Жағдайлардың жеңілдеуі инфляцияның, ақша және кредит нарықтарындағы пайыздық мөлшерлемелердің төмендеуіне, сауда жағдайларының жақсаруына, сондай-ақ әлемдік қор нарығының өсуіне байланысты.

GaR бағалауы 2023 жылғы 4-тоқсанда макроқаржылық жағдайлардың жақсаруы қысқа- және орта мерзімді кезеңде Қазақстанның ІЖӨ-нің орташа шартты өсуін арттыратынын көрсетіп отыр. Ағымдағы макроқаржылық жағдайлардың әсерін ескере отырып, GaR моделі негізінде есептелген экономиканың өсуі бойынша ҚР Үкіметінің базалық болжамының үлестіріліміне сәйкес ІЖӨ-нің медиандық өсуі 2024 жылы 4,1% және 2025 жылы 5,0% деңгейінде бағаланады.

Жалпы макроқаржылық жағдайлардың жеңілдеуі аясында алдыңғы тоқсандағы бағалаумен салыстырғанда экономикалық перспективалар үшін ағымдағы тәуекелдер төмендеді.

Қаржылық жағдайлар мен макрокөрсеткіштер индекстерінің серпіні, олардың ІЖӨ-нің шартты өсуіне әсерін бағалау, сондай-ақ FCI жаһандық индексі және негізгі тұжырымдар туралы толығырақ Есептің толық мәтінінен танысуға болады.

Сонымен қатар, қазіргі уақытта Агенттік «Inflation at Risk» (IaR – Тәуекел жағдайындағы инфляция) моделін әзірлеп жатқанын қосымша хабарлаймыз. Есептің келесі басылымдарында IaR моделінің аралық нәтижелері енгізілетін болады.

[1] FCI жиынтық индексінің оң мәні неғұрлым қатаң/шектеулі жағдайларға, ал теріс мәні неғұрлым қолайлы/жеңілдететін жағдайларға көрсететінін еске саламыз.

• 13.03.2024
• 170