С. Жақыпова жұмыс сапарымен Алматы қаласына келді

ҚР Еңбек және халықты әлеуметтік қорғау министрі Светлана Жақыпова Алматы қаласына жұмыс сапарымен келді. Еңбекминінің басшысы мегаполис тұрғындарымен кездесу өткізеді, Мансап орталығының жұмысымен танысады және бірқатар әлеуметтік нысандарды аралайды.

Светлана Жақыпова жұмыс сапарын «АРДИ» мүгедектігі бар балалардың ата-аналары қауымдастығының оңалту орталығына барудан бастады. Орталық мемлекеттік әлеуметтік тапсырыс шеңберінде «Мүгедектігі бар балаларға және тірек-қимыл аппараты бұзылған 18 жастан асқан адамдарға арналған күндізгі болу қызметі» жобасын іске асырады. Мекеме басшысы Әсия Ахтанова орталықта балалардың церебральды сал ауруы және тірек-қимыл аппараты бұзылған балаларды оңалтудың озық әдістемелері мен заманауи тәсілдері қолданылатынын атап өтті.

Сондай-ақ Светлана Жақыпова Алматы қаласының әкімі Ерболат Досаевпен кездесті. Тараптар еліміздің ірі қаласында Мемлекет басшысының әлеуметтік-еңбек саласына байланысты тапсырмаларын іске асыру барысын талқылады. Атап айтқанда, халықты жұмыспен қамту және әлеуметтік қолдау, кәсіпорындардағы еңбек қауіпсіздігі мен еңбекті қорғау, мүгедектігі бар адамдар үшін кедергісіз орта құру және басқа да мәселелер қаралды.

Сонымен қатар Еңбекминінің басшысы жұмыс сапары аясында халықпен кездесу өткізіп, азаматтарды жеке мәселелері бойынша қабылдайды, республикалық және жергілікті БАҚ өкілдеріне арналған брифингте журналистердің сұрақтарына жауап береді, сондай-ақ бірқатар әлеуметтік нысандарға барады.

• 27.03.2024
• 114