ҚР СІМ басшысы Қазақстандағы дипломатиялық корпустың Дуайенін қабылдады

Астана, 2024 жылғы 3 сәуір – Қазақстан Республикасы Премьер – Министрінің орынбасары – Сыртқы істер министрі Мұрат Нұртілеу Астанада аккредиттелген дипломатиялық корпустың Дуайені, Палестинаның Қазақстандағы Елшісі Монтасер Әбу Зейдті қабылдады.

Кездесу барысында тараптар Қазақстандағы дипломатиялық корпустың тыныс-тіршілігінің бірқатар мәселелерін және оның қазақстандық сыртқы саяси ведомствомен өзара іс-қимылын одан әрі нығайту перспективаларын талқылады.

Тараптар Сыртқы істер министрлігі мен дипкорпус арасында тұрақты диалогты қолдаудың, кездесулер ұйымдастырудың және түрлі мәдени және әлеуметтік маңызды іс-шараларды өткізудің маңыздылығын атап өтті.

Дуайен М.Әбу Зейд Министрге Қазақстандағы шетелдік дипломатиялық өкілдіктердің қызметін жүзеге асыру үшін қолайлы жағдайларды қамтамасыз етуде көрсеткен қолдауы үшін ризашылығын білдірді.

Сонымен қатар, Палестина Елшісі Министрді Газа секторының ағымдағы жағдай туралы хабардар етті, сондай-ақ тараптар халықаралық күн тәртібіндегі өзекті мәселелер бойынша пікір алмасты.

М.Әбу Зейд Қазақстан басшылығы мен халқына Палестина халқын қолдағаны үшін, оның ішінде 1 млн АҚШ доллары көлемінде қаржылай көмек сондай-ақ, өткен жылғы желтоқсан айында Газа секторына жіберілген
38 тонна гуманитарлық көмек үшін алғыс білдірді.

• 04.04.2024
• 216