Үкіметте су айдындарындағы қауіпсіздік мәселесі қаралды

Бүгін Төтенше жағдайлар министрі Шыңғыс Әрінов Үкіметтің су айдындарындағы қауіпсіздік мәселесі жөніндегі отырысында сөз сөйледі.

ТЖ министрі хабарлағандай, азаматтардың су айдындарындағы қауіпсіздігін қамтамасыз ету – ТЖМ-нің маңызды бағыттарының бірі. Халықты қорғау бойынша қабылданған шаралары өзінің нәтижесін көрсетіп, 2020 жылдан бері судағы адам өлімінің саны 437-ден 227-ге дейін азайды.

Құтқарушылары жыл басынан бері  76 адамды, суға шомылу маусымы басталғалы – 24 адамды құтқарды. Ағымдағы жылдың басынан бастап  45 адам, ал 1 маусымнан бері 27 адам суға батып кетті.

Қазіргі таңда, су айдындарында ТЖМ 42 құтқару бекеті халықтың қауіпсіздігін қамтамасыз етеді. Келесі жылы Шалқар, Имантау көлдерінің бойында және Қосшы қаласында 3 модульдік станцияның құрылыстары аяқталады. Бірақ ірі су қоймаларында 15 станция жеткіліксіз.

Қосымша ретінде ТЖМ жазғы кезеңде қайықтармен және құтқару құралдарымен жабдықталған мобильді посттар қояды. Олар су айдындарына кезекшілік пен патрульдеу  жұмыстарын жүзеге асырады.

ТЖМ заманауи катерлер, жүзу құралдарын және дрондарды жоспарлы түрде сатып алуда. Сонымен қатар, Маңғыстау облысында Каспий теңізінің жағалауында Ұлттық теңіз жасағын құру жұмыстары жүргізілуде.

Суға батып кеткендердің 95 %-і тыйым салынған орындарда тіркелетінін ескере келе, әкімдіктермен бірлесіп суға шомылу мен демалуға рұқсат етілген орындарды жылдан жылға ұлғайтудамыз. Олардың саны бүгін 708-ге жетті және барлығы «2GIS» платформасында орналасқан. Маусым айының аяғына дейін тағы  33 жағажай қосымша ашылатын болады.

Сондай-ақ, кейбір жағажайлар белгіленген талаптар мен санитарлық нормаларға сәйкес келмейді, соның салдарынан жазатайым оқиғалар орын алады. Мысалы өткен жылы рұқсат етілген демалыс орындарында 5 адам суға батып кетті. Тағы бір тоқталатын жайт, демалушылар белсенді түрде гидроциклдерді пайдаланады, ал оларды дұрыс пайдаланбау қаза болу қаупіне әкелуі мүмкін.

ТЖМ балалардың қауіпсіздігіне ерекше көңіл бөледі. Суға шомылу маусымы басталар алдында және оның барлық кезеңінде балаларға жүзуді, құтқару және алғашқы көмек көрсету дағдыларын үйретеді.

Бала өлімінің басты себебі – ересектердің балаларды қараусыз қалдыруы. Осыған байланысты біз балалар лагерлерінің тәрбиешілерімен және ата-аналарымен нұсқаулықтар өткіземіз.

Қазіргі уақытта елімізде су айдындарының жанында орналасқан 30-дан астам балалар лагері жұмыс істейді. Олардың тек 19-ында ғана балаларға арналып жабдықталған суға шомылу орындары бар.

ТЖМ полициямен бірлесіп рұқсат етілген және тыйым салынған орындарда патрульдеу мен рейдтер өткізеді. Жыл басынан бері 26 мыңнан аса осындай шара жүргізіліп, құқық бұзған 3 мыңға жуық адам әкімшілік жауапкершілікке тартылды, ағымдағы жылғы 1 маусымнан бастап 49 адам жауапкершілікке тартылды.

ТЖМ күштері мен құралдары жоғары дайындыққа ауыстырылды. Халықтың қауіпсіздігін қамтамасыз ету мен ел аумағын қорғауға қажетті шаралар қабылданады.

• 20.06.2024
• 144