- Блогтар
- Омаров М.Т.
Омаров М.Т.
ҚР Бәсекелестікті қорғау және дамыту агенттігің төрағасы
АСТАНАДА ЖЕКЕШЕЛЕНДІРУ ЖӨНІНДЕГІ ҰЛТТЫҚ КЕҢСЕНІҢ БІРІНШІ ОТЫРЫСЫ ӨТТІ
27 маусымда ҚР Бәсекелестікті қорғау және дамыту агенттігінің Төрағасы Марат Омаровтың төрағалығымен Жекешелендіру жөніндегі Ұлттық кеңсенің бірінші отырысы өтті. Онда 2024-2028 жылдарға арналған Жекешелендірудің стратегиялық бағыттары мен тәсілдері бекітілді. Бастамалар экономикалық ырықтандыруды жеделдетуге, мемлекеттің экономикадағы үлесін азайтуға және инвестициялар тартуға бағытталған.
Тауар нарықтары мен квазимемлекеттік сектор субъектілеріне талдау жасау, сондай-ақ жыл соңына дейін жекешелендіру үшін мемлекеттік активтердің тізбесін қалыптастыру Бәсекелестікті қорғау және дамыту агенттігі жүргізетін болады. Сонымен қатар, Агенттік кеңсенің жұмыс органы ретінде жұмыс істеп, отырыстарды ұйымдастырады және қажетті құжаттарды дайындауды үйлестіреді. Құрамына парламент депутаттары, министрліктердің негізгі өкілдері, сондай-ақ ірі ұлттық холдингтердің басшылары кіреді.
Агенттік Төрағасының орынбасары Болат Самбетов жекелеген активтерді жекешелендіру туралы шешім қабылдағанға дейін тауар нарықтарын талдаудан бастап жекешелендіруге дайындық үдерістеріне назар аударды. Ол кеңсенің негізгі мақсаты — Жеке кәсіпкерлікті дамыту үшін жағдай жасау және мемлекеттік секторды қысқарту екенін атап өтті.
БҚДА Төрағасының орынбасары сондай-ақ ағымдағы жекешелендіру процесінің проблемаларына қатысты мәселелерді қозғады. Мысалы, сатуға арналған активтерді анықтауда айқындықтың болмауы және процестерді оңтайландыру үшін халықаралық тәжірибені зерделеу қажеттілігі.
«Кеңсе қызметінің маңызды мақсаты экономикалық кеңістікті босату және жеке кәсіпкерліктің әлеуетін толыққанды іске асыру, жекешелендіруді аяқтау арқылы экономикадағы мемлекеттік секторды ауқымды және жедел қысқартуды жүргізу», - деді Б.Самбетов.
Ұлттық кеңсенің жұмысы жекешелендіру үшін мемлекеттік субъектілер мен активтердің тізімін қалыптастыруды қоса алғанда, бірнеше кезеңдерде бөлінген. Бұл процесс экономиканың жалпы тиімділігін жақсартады және бизнеске әкімшілік қысымды төмендетеді деп күтілуде.
- 05.07.2024
- 150