ҚР АШМ АӨК дамыту жөніндегі ұлттық жобаға өңірлердің ұсыныстарын енгізуге дайын екенін мәлімдеді

         ҚР Ауыл шаруашылығы министрлігі фермерлермен, ауыл шаруашылығы мәселелеріне жетекшілік ететін республикалық маңызы бар қалалар және облыс әкімдерінің орынбасарларымен, ауыл шаруашылығы басқармаларының басшыларымен өткен кеңесте АӨК дамыту жөніндегі ұлттық жобаның Тұжырымдамасын ұсынды

         Кеңес барысында Ауыл шаруашылығы министрі Сапархан Омаров тұжырымдаманы әзірлеуге БҰҰ Азық-түлік және ауыл шаруашылығы ұйымының сарапшылары, «Атамекен» ҰКП, бизнес және ғылыми қоғамдастық өкілдері қатысқанын атап өтті.

         Ұлттық жоба тұжырымдамасының негізгі жаңашылдықтары туралы ҚР АШМ вице-министрі Рүстем Құрманов айтып берді. Атап айтқанда, ол құжат АӨК дамытудың 15 басым бағытынан тұратынын, олардың әрқайсысы бойынша нақты шаралар мен индикативтер көзделгенін хабарлады.

          Сапархан Омаров кеңеске қатысушыларды құжатты талқылауға шақыра отырып, Ауыл шаруашылығы министрлігі өңірлердің барлық ұтымды ұсыныстарын қарауға және ұлттық жоба тұжырымдамасына енгізуге дайын екенін айтты.

          «Ауыл шаруашылығы ел экономикасының басым бағыттарының бірі болып табылатынын ескере отырып, аймақ әкімдерінің орынбасарларынан өңірлердің ерекшелігін ескере отырып, АӨК саласын дамыту тетіктерін әзірлеу үшін өңірлік жұмыс топтарын жедел құруға шақырамын. Сонымен қатар, мәселелерді көрсетіп қана қоймай, оларды шешу жолдарын да ұсынуды сұраймын. Министрліктің құрылымдық бөлімшелерінің басшыларына келіп түскен барлық ұсыныстарды назарға алуды тапсырамын», - деп атап өтті министр.

• 10.02.2021
• 280