«Солтүстік-Оңтүстік» I-ші көлік сауда-экспорттық форумы ауыл шаруашылығы өнімдерінің экспортын дамытуға жаңа серпін береді

19-20 шілдеде Ақтауда «Солтүстік-Оңтүстік» бірінші көлік сауда-экспорттық форумы өтуде, оның негізгі мақсаты – «Солтүстік-Оңтүстік» халықаралық көлік дәлізі арқылы тауарлар экспортын дамыту.

Форумға Түрікменстан, Өзбекстан, Ресей Федерациясы, Беларусь Республикасы, Ауғанстан, Иран, Оман және т.б. сияқты 14 елден делегаттар қатысты.

Форум аясында Ауыл шаруашылығы министрлігі "Ауыл шаруашылығы өнімдерінің экспорттық әлеуетін дамыту" тақырыбында жеке панельдік сессия өткізді, онда бизнес, салалық қауымдастықтар мен одақтар, "Азық-түлік келісім шарт корпорациясы" ҰК "АҚ өкілдері және нарықтың басқа да қатысушылары өз пікірлерін ортаға салды.

ҚР АШМ Аграрлық азық-түлік нарықтары және ауыл шаруашылығы өнімдерін қайта өңдеу департаментінің директоры Назгүл Хатепова құттықтау сөз сөйледі.

Сессияда ауыл шаруашылығы өнімдерін Каспий маңы елдеріне экспорттау, логистика, экспортталатын өнімнің сапасын бақылау, көлік-логистикалық инфрақұрылымды дамыту мәселелері талқыланды.

Қазақстан астық одағының өкілі Ирина Мирманова Қазақстанның алдағы маусымдағы астық және бұршақ дақылдарының экспорттық әлеуеті туралы айтты.

Қазақстан Республикасы Майлы дақылдарды өңдеушілер ұлттық қауымдастығының төрағасы Ядықар Ибрагимов өз сөзінде қазақстандық май және май өнімдерін Каспий жағалауы елдеріне экспорттау әлеуеті туралы баяндады.

Еліміздегі ең ірі инспекциялық компаниялардың бірі «Baltic Control Kazakhstan» компаниясының өкілі Гүлмира Әбішева экспортқа шығарылатын өнімдердің барлық халықаралық стандарттарға сәйкестігін сертификаттаудағы мамандандырылған компаниялардың рөлі туралы айтты.

Қазақстан-Сауд Арабиясы Іскерлік кеңесінің тең төрағасы Қанат Құдайберген ауыл шаруашылығы өнімдерін Ауғанстан арқылы экспорттауға арналған баламалы темір жол бағытын ұсынды.

Сондай-ақ «Ақбидай терминалы» АҚ басқарма төрағасы Сағат Ыдырысов «Ақбидай терминалы» АҚ астық терминалдарының мүмкіндіктеріне тоқталды.

«Халық» қайырымдылық қорының атқарушы директоры Самал Урасаева Түркіменстанға, Иранға, Ауғанстанға және Өзбекстанға астық пен ұнды ауыстырып тиеу мүмкіндігі зор Бейнеу астық терминалының іске қосылуы туралы айтты.

Аталған іс-шара Каспий маңы өңіріндегі сауданы дамытуға жаңа серпін береді, Иран арқылы Парсы шығанағы елдеріне транзитпен ауыл шаруашылығы өнімдерін экспорттау бойынша оңтайлы бағыттарды табуға және елімдің Кавказ елдеріне жүк жеткізу жөніндегі әлеуетін пайдалануға мүмкіндік береді деп жоспарлануда.

• 02.08.2024
• 129