ҚҰРМЕТТІ ОТАНДАСТАР!

Өзімнің және Бас прокуратураның ұжымы атынан баршаңызды келе жатқан мемлекеттік мереке – Қазақстан Республикасының Конституциясы күнімен құттықтаймын. Президент ұсынған және жалпыхалықтық референдум қолдаған 2022 жылғы конституциялық реформаның арқасында біз осы заманғы демократиялық мемлекет құрылысының жаңа кезеңіне көштік. Жаңартылған Конституция Әділ Қазақстан тұжырымдамасының негізгі тірегіне айналды. Конституцияда жарияланған жоғары құндылықтарды – адамды, оның өмірін, құқықтары мен бостандықтарын қорғау құралдары нығайтылды. Парламенттің қызметі мен Үкіметтің өкілеттіктері жаңғыртылды, прокуратура органдары мен Адам құқықтары жөніндегі уәкілдің құқық қорғау функциялары мен мәртебесі күшейтілді. Қайтадан құрылған Конституциялық Сот азаматтардың конституциялық құқықтарын қорғаудың және Негізгі Заңның үстемдігін қамтамасыз етудің ең жақсы үлгісін көрсетеді. Конституция қоғам мен мемлекеттің бір мүддеге бірігуінің қуатты бастамасы ретінде, азаматтық ауызбіршілік жағдайында елдің үдемелі дамуын қамтамасыз етеді. Конституция күні қарсаңында баршаңызға шын жүректен отбастарыңызға амандық, өркендеу, бейбітшілік пен келісім тілеймін!

• 29.08.2024
• 90