Қазақстан СІМ басшысы АҚИҰ Бас директорын қабылдады

Астана, 2024 жылғы 9 қыркүйек – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Азық-түлік қауіпсіздігі жөніндегі Ислам ұйымының (АҚИҰ) Бас директоры Берік Арынды қабылдады.

Кездесу барысында тараптар Ұйымға мүше мемлекеттерде азық-түлік қауіпсіздігін қамтамасыз етуге бағытталған Қазақстан мен АҚИҰ арасындағы өзара іс-қимылдың өзекті мәселелерін талқылады.

Министр Ислам ынтымақтастығы ұйымының мамандырылған құрылымының дамуына одан әрі ықпал ету үшін мүше мемлекеттермен ынтымақтастықты кеңейту, сондай-ақ ауыл шаруашылығы саласындағы жергілікті және халықаралық сарапшыларды тарту арқылы АҚИҰ жобалық жұмысының тиімділігін арттыру қажеттілігін атап өтті.

АҚИҰ Бас директоры, өз кезегінде, климаттың өзгеруі, су ресурстарын тиімді пайдалану және жеткізу тізбектерінің бұзылуы жөніндегі мәселелері сияқты жаһандық үрдістерді ескере отырып, бірқатар мақсатты жобалардың жүзеге асырылуы барысы туралы хабардар етті.

АҚИҰ мүшелерінің ауыл шаруашылығындағы биоалуантүрлілікті сақтауға бағытталған Қазақстан аумағында Гендік банкті құру жобасына ерекше назар аударылды.

Бұған қоса сұхбаттастар 2025 жылы Астанада өткізілуі жоспарланған АҚИҰ Бас ассамблеясының 7-ші сессиясына дайындық барысы және аталған басқосу аясында Ұйымдағы төрағалықтың Қазақстанға өтуі туралы мәселелерді талқылады.

Кездесу соңында тараптар ИЫҰ кеңістігіндегі азық-түлік қауіпсіздігі мәселелерін шешу мақсатында екіжақты және көпжақты ынтымақтастықты жалғастыруға келісті.

АҚИҰ 2013 жылы Қазақстан Республикасының бастамасымен құрылды. Штаб-пәтері Астана қаласында орналасқан.

• 13.09.2024
• 48