МҚІА төрағасы ҚР Президенті жанындағы Мемлекеттік басқару академиясының магистранттары және докторанттарымен кездесті

Мемлекеттік қызмет істері агенттігінің төрағасы Дархан Жазықбай Президент жанындағы Мемлекеттік басқару академиясының магистратура мен докторантура бағдарламарына оқуға түскен мемлекеттік қызметшілермен кездесті.

Агенттік төрағасы мемлекеттік қызметшілердің кәсіби құзыреттері мен біліктілігін арттыру үшін қажетті жағдайлар жасалғанын, мемлекеттік қызметті дамыту бойынша қабылданып жатқан шаралар мен алдағы міндеттер туралы айтып, мемлекеттік қызметшілер үшін әдеп стандарттарын сақтаудың, коммуникативтік дағдыларды жетілдірудің маңыздылығына тоқталды.

«Мемлекет басшысы биылғы жолдауында «Халық үніне құлақ асатын мемлекет» тұжырымдамасын ұсынғалы қоғам мен билік құрылымдары арасындағы қарым-қатынас мәдениеті өзгергеніне тоқталып, мемлекет пен қоғам арасындағы диалогтың сапасын одан әрі арттыра түсу үшін бәріміз адал әрі әділ болуымыз, тек заң аясында әрекет етуіміз, берген уәдеміз бен ісіміз үшін жауап бере білуіміз керек» деп атап көрсетті. Бұл мемлекеттік қызметшілер үшін алдағы уақытта да ашықтық, әділдік қағидатын ұстанудың маңыздылығын көрсетеді», - деді МҚІА төрағасы.

Дархан Жазықбай мемлекеттік қызметті дамытудың 2024-2029 жылдарға арналған жаңа тұжырымдамасының негізгі міндеттеріне тоқталып, мемлекеттік қызметті дамытудың басым бағыттарын атап өтті.

МҚІА төрағасы заңнамаға енгізілген өзгертулерге сәйкес, Академияны жоғары көрсеткішпен бітірген түлектерге мансаптық ілгерілеудің конкурстан тыс мүмкіндіктері беріліп отырғандығын айтты. Осы жаңашылдық аясында 24 түлек жоғары лауазымдарға конкурссыз тағайындалды.

Академияның тыңдаушылары мемлекеттік қызметшілерді оқытуға және мемлекеттік қызметті өткеруге қатысты ұсыныстарын айтып, өз ойларымен бөлісті.

Кездесу соңында МҚІА төрағасы Дархан Жазықбай жаңа идеялар мен ұсыныстарға әрқашан ашық екенін айтып, магистранттар мен докторанттарды мемлекеттік қызметті жетілдіру жұмысына белсенді қатысуға шақырды.

• 30.09.2024
• 47