Өңірдегі инвестициялық жобалар шоғырланған «SPK TURKISTAN» өндірістік паркінің әлеуеті зор

Ел Президенті Қасым-Жомарт Кемелұлы өңірімізге іссапары барысында  «SPK TURKISTAN» өндірістік паркінде болып, инвестициялық жобалар мен кәсіпорындардың жұмысымен танысты. Өндірістік паркте жалпы құны 96,9 миллиард теңгені құрайтын 29 инвестициялық жобаны іске асыру жоспарланған. Бүгінде 8 өндіріс іске қосылып, 700-ден аса жаңа жұмыс орны ашылды.

Мемлекет басшысы, ең алдымен, көкөніс сақтау қоймасымен танысты. Мұнда 3,5 мың тонна көкөніс пен 500 тонна бакалея өнімдері сақталып, Түркістан, Кентау және Арыс қалаларын маусымаралық кезеңде азық-түлікпен қамтамасыз етіледі. Алдағы уақытта ірі елді мекендерді әлеуметтік маңызы бар қолжетімді азық-түлікпен қамтамасыз ету үшін Сарыағаш қаласынан 2 мың тонналық қойма салуды жоспарлап отырмыз.

Өңірдегі егістік алқаптарға су үнемдеу технологиясын енгізу жұмыстары жүйелі жүргізіліп жатыр. Мемлекет басшысына жаңбырлатып және тамшылатып суару жүйелерін шығаратын «BNK Group» серіктестігінің өндіріс цехтарын таныстырдық. Мұнда тамшылатып суару қондырғыларын шығаратын тағы екі зауыт ашылмақ.

Мемлекет басшысы «Аqniet Holding» өнімдерін көрді. Кәсіпорында білім беру мекемелеріне арналған жиһаз және медицина мекемелеріне арналған жабдықтар жасалады. Өңірде салынып жатқан білім ұяларын осындай отандық жиһаздармен жабдықтап жатырмыз.

Президент тоңазытқыш және мұздатқыш жабдықтарын өндіретін «Jasyl suyq Qazaqstan» кәсіпорнының өндіріс алаңына барды. Болгариялық UBC Group холдингі Түркістан облысында екі ірі өндіріс желісін ашуға ниетті. Жоба толық іске қосылғанда 10 мыңға дейін тоңазытқыш жабдығын шығарып, мың адамды жұмыспен қамту жоспарланып отыр.

Қасым-Жомарт Тоқаев «Turan Su» мекемесінің қызметімен танысты. Мемлекет меншігіндегі ирригациялық жүйелер мен гидрологиялық құрылыс жайларын күтіп ұстау, жөндеу және реконструкциялау, елді мекендерді ағын сумен қамтамасыз ету бағытында жұмыс атқаратын мекемеде инвест жобаларды да жүзеге асыра бастады. Биыл кәсіпорын индустриялық парк аумағында тамшылатып суару жүйесін шығаратын өндірісті іске қосты. Одан бөлек,  мекеме суару жүйелеріне арналған параболалық науалар өндірісін қолға алмақ.

• 02.10.2024
• 37