Түркістанда 110 киловольттық «солтүстік» қосалқы станциясы ашылды

Мемлекет басшысы Қасым-Жомарт Кемелұлы биылғы Жолдауында электр қуатының қолжетімді болуы халықтың тұрмыс сапасына тікелей әсер ететін атап өтті. Жалпы, елімізде электр қуатының тапшылығы сезіліп отырғаны жасырын емес. Облыс аумағында ауқымды өндіріс орындарын ашуда электр энергиясы тапшылығының өз кедергісі бар. Енді біз оны шешу үшін маңызды жобаларды жүзеге асырудамыз. Атап айтқанда, Сайрамда 1000 МВт бу-газ станциясының құрылысы жүргізілуде, Түлкібаста 320 МВт және Кентауда 240 МВт газ турбина станциялары, Сауран ауданында 300 МВт күн электр станцияларының жобалау-сметалық құжаттамалары әзірленуде. Сонымен қатар облыста жоғары кернеулі Төлеби ауданында «Алатау», Жетісай ауданында «Жетісай» қосалқы станцияларының құрылысы басталған. Бұл станциялар толық іске қосылғанда, жаңа өнеркәсіп көздерін ашуға қажетті электр энергиямен қамтылады. Сонымен қатар Түркістан қаласы аумағында 110/10 киловольттық «Сауран», «Нұртас» қосалқы станцияларының құрылысы алдағы 2 жыл көлемінде іске асады деп жоспарлап отырмыз.

Бүгін 110 киловольттық «Солтүстік» қосалқы станцияның ашылу рәсіміне қатыстық. Осы станция арқылы «Түркістан» индустриалды аймағында шоғырланған өнеркәсіптік нысандары сапалы электр энергиясымен қамтылады. Жобаны іске асыруда отандық өндірушілердің материалдары мен жабдықтары қолданылды. Сонымен қатар облыстағы индустриалды аймақтарға қолайлы жағдай жасау мақсатында Үкіметке электр энергия бағасын төмендету бойынша ұсыныс енгіздік. Нәтижесінде ұсыныс қолдау тауып, бүгінгі таңда тариф бағасы 47 теңгеден 25 теңгеге түсті. Бұл – өндірісті дамытуға серпін береді. Аталған қосалқы станцияларды іске қосу арқылы энергия тапшылығынан құтылуға жол ашылады. Бұл қосалқы станция Түркістан индустриалды және еркін экономикалық аймағында шоғырланған өнеркәсіптік нысандарын сапалы электр энергиясымен қамтамасыз етпек.

• 02.10.2024
• 82