Жыл сайынғы форумда сақтандыру нарығын дамытудың өзекті мәселелері айтылды

Алматыда Қаржы нарығын реттеу және дамыту агенттігінің қолдауымен "Сақтандыру төлемдеріне кепілдік беру қоры" АҚ (СТКБҚ) ұйымдастырған жыл сайынғы сақтандыру форумы өтті. Іс-шараға Агенттіктің, сақтандыру нарығының өкілдері, сақтандыру саласындағы халықаралық сарапшылар, сондай-ақ Дүниежүзілік банк, Азия Даму Банкі және Испанияның Сегурос өтемақыларының Ұлттық консорциумы (Consorcio de compensación de Seguros) сияқты халықаралық ұйымдардың өкілдері қатысты. Панельдік сессиялар аясында қатысушылар сақтандыру нарығын реттеу бағыттарын, апатты сақтандыру модельдерін құру бойынша үздік халықаралық тәжірибелерді, өмірді сақтандыру саласын дамытудың негізгі аспектілерін және сақтандыру саласын цифрландыруды дамыту жолдарын талқылады. Атап айтқанда, соңғы жылдары сақтандыру өнімдерінің желісі едәуір кеңейтілді, сақтандыру омбудсманының дауларды сотқа дейінгі міндетті реттеу рәсімін енгізуді қоса алғанда, тұтынушылардың құқықтарын қорғауды арттыру жөніндегі міндеттер іске асырылды. Сақтандыруды цифрландыруды дамытуда айтарлықтай прогреске қол жеткізілді. Ағымдағы жылдан бастап шағын ЖКА бойынша сақтандыру жағдайларын оңайлатылған реттеу (Еуропа хаттамасы), сондай-ақ сақтандырудың барлық міндетті сыныптары бойынша онлайн-реттеу қолданылады. Сақтандыру форумы сақтандыру саласын дамытудың перспективалық бағыттарын айқындау, тәжірибе, сараптамалық пікір алмасу және жаңа кәсіби байланыстар орнату үшін маңызды алаңға айналды.

• 04.10.2024
• 48