Қазақстан СІМ басшысы Люксембургке сапар жасады

Люксембург, 2024 жылғы 14 қазан – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Люксембург Ұлы Герцогтігіне ресми сапар жасады.

Сапар барысында Қазақстанның сыртқы саяси ведомствосының басшысы Люксембург Премьер-Министрі Люк Фриденмен және Люксембург Премьер-Министрінің орынбасары – Сыртқы істер және сыртқы сауда министрі Ксавье Беттельмен кездесті.

Тараптар Қазақстан мен Люксембург арасындағы ынтымақтастықтың негізгі мәселелерімен қатар қаржы технологиялары, «жасыл» энергетика арқылы тұрақты даму, фармацевтика және көлік инфрақұрылымы жобалары сияқты келешегі бар бағыттарды талқылады. Екі елдің іскерлік қоғамдастықтары үшін мүмкіндіктерді кеңейту және экономикалық байланыстарды нығайту қажеттілігі расталды.

Премьер-Министр Люк Фриден «Люксембург Қазақстанды Орталық Азиядағы сенімді серіктес ретінде қарастыратынын және елдеріміз арасындағы сауда-экономикалық ынтымақтастықты одан әрі тереңдету үшін үлкен әлеует бар екенін» атап өтті. Ол қазақ тарапының экономиканың негізгі салаларын жаңғырту және озық технологияларды енгізу жөніндегі ұмтылыстарын қолдауға дайын екенін білдірді.

Өз кезегінде, Қазақстан СІМ басшысы Люксембургты Қазақстанның Еуропалық Одақтағы маңызды серіктесі ретінде атап өтті. 2005 жылдан бастап Люксембургтен Қазақстанға тікелей инвестициялардың жалпы ағыны 2,9 млрд АҚШ долларын құрады.

Тараптар Қазақстан мен Еуропалық Одақ арасындағы өзара іс-қимыл мәселелеріне де назар аударып, сауда-экономикалық байланыстарды кеңейтуге, сондай-ақ Орталық Азиядағы қауіпсіздік пен тұрақтылық мәселелері бойынша ынтымақтастыққа ерекше көңіл бөлді. Сонымен қатар тараптар халықаралық күн тәртібіндегі өзекті мәселелер бойынша пікір алмасты.

Люксембург Сыртқы істер министрі К. Беттель Қазақстанның өңірлік қауіпсіздікті нығайтудағы күш-жігерін жоғары бағалайтынын атап өтті. Елдерімізді жаһандық сын-қатерлерге қатысты ортақ көзқарастар біріктіретіні айтылды. Люксембург Қазақстанмен халықаралық қауіпсіздік және орнықты даму мәселелері бойынша ынтымақтастықты кеңейтуге дайын, өйткені БҰҰ және басқа да халықаралық ұйымдар шеңберінде бейбітшілік пен тұрақтылықты нығайту бағытында бірлескен жұмыс үшін үлкен мүмкіндіктер бар деп санайды.

Кездесулер соңында тараптар екіжақты қарым-қатынастарды барлық деңгейде нығайтуға және өңірлік пен жаһандық маңызды мәселелерді шешуде халықаралық ұйымдар аясында белсенді ынтымақтастық орнатуға ниетті екенін растады.

• 16.10.2024
• 33