Қазақстан мен Еуропалық инвестициялық банк өзара тиімді ынтымақтастықты нығайтуға ниетті

Люксембург, 2024 жылғы 15 қазан – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Люксембургке сапары барысында Еуропалық инвестициялық банктің президенті Надия Кальвиньомен кездесу өткізді.

Тараптар Қазақстандағы негізгі инвестициялық және инфрақұрылымдық жобаларды іске асыру мәселелерін талқылады. Су ресурстары мәселелеріне ерекше назар аударылды. ҚР СІМ басшысы Орталық Азия өңірі үшін аса маңызды ағынды суларды тазарту жүйелерін жаңғырту және су тасқынынан қорғау құрылыстарын салу жөніндегі жұмысты жандандыру қажеттігін атап өтті.

Транскаспий халықаралық көлік бағыты (Орта дәліз) шеңберінде көлік инфрақұрылымын дамыту мәселелері жеке талқыланды. «Біз еуропалық серіктестерімізді өңірдің сауда-көлік байланыстарын одан әрі дамытуға ықпал ететін стратегиялық маңызды жобаларға қатысуға шақырамыз», – деп мәлімдеді Министр.

Күн тәртібінде Қазақстанның орнықты дамуын ынталандыруға бағытталған жобаларды, оның ішінде «жасыл» технологиялар және цифрлық инфрақұрылым саласындағы жобаларды қаржыландыру мәселесі де тұрды.

Тараптар инвестициялық ынтымақтастықты одан әрі тереңдету және Қазақстан үшін басым салаларда бірлескен жобаларды іске асыру туралы уағдаласты.

Сонымен қатар М. Нұртілеу жетекші бельгиялық және люксембургтік компаниялардың өкілдерімен бірқатар кездесулер өткізіп, олардың барысында өзара тиімді серіктестікті одан әрі дамыту мәселелері талқыланды.

«Sarens» компаниясының басшылығымен көлік-логистика саласындағы ынтымақтастық перспективалары қарастырылып, еліміздің Орта дәліздің әлеуетін дамытуға бағытталғандығы аталып өтті.

«Cargolux» компаниясының акционерлерімен кездесу барысында жүк авиатасымалдары саласындағы қазақстандық әуе айлақтарының мүмкіндіктерін кеңейтуге басты назар аударылды.

Сондай-ақ «SES» компаниясының басшысымен кездесу өтіп, сұхбаттастар Қазақстанның цифрлық технологиялар саласындағы жетістіктерін ескере отырып, өзара тиімді кооперация туралы уағдаласты.

• 16.10.2024
• 33