Түркістанда кәсіпорындар ашу бағытында ауқымды жұмыстар жүргізілуде

Түркістанда кәсіпорындар ашу бағытында ауқымды жұмыстар жүргізілуде. Ол үшін арнайы аймақтар да құрылған. Кәсіп иелерімен де тікелей жұмыс жүргізіп жатырмыз. Сауран ауданы да өндіріс аймағына айналып келеді. Ауданда 2030 жылға дейін ауданда 53,1 млрд. теңгенің 85 жобасын іске асыруды жоспарланған. Нақтырақ айтқанда, тоқыма бұйымдарын өндіру, тамшылатып және жаңбырлатып суару жабдықтарын шығару, жиһаз, пластмасса бұйымдар өндіру, құрылысқа қажетті материалдарын шығаратын зауыттар мен фабрикалар жұмысын бастайды. Нәтижесінде, 2,5 мыңға жуық жаңа жұмыс орыны ашылып, кіріс артпақ. Өндіріс алаңдары құрылады.

Бүгін Сауран ауданына іссапармен барып, Қазақстанның ХХХ жылдығы елді мекеніндегі бетон зауытында болдым. Мұнда бетон бұйымдарының барлық түрі шығарылады. Бағасы да қолжетімді. Зауытта 100-ге жуық жергілікті тұрғын жұмыс істейді.

Бұдан бөлек, Сауран ауданында да мақта шаруашылығын дамыту бойынша маңызды жобаларды жүзеге асырмақпыз.

Сауран ауданына жұмыс сапары барысында  мақта қабылдау және қайта өңдеу зауытында болдым. Мұнда жылына 12 мың тонна мақта өңделеді. Өндірілген өнім Ресей, Беларусь және Қытай елдеріне сатуға шығарылады. Былтыр 8 мың тонна мақта өнімін қабылдап, қайта өндеген. Бұдан бөлек, аудандағы мақтаны қайта өңдеу цехының жұмысымен таныстым. Зауыт жылына 600 тонна мақтаны қайта өңдеп, өндірілген өнімді Қытай мен Түркияға сатады.

Түркістан облысы елімізде мақта өсіретін жалғыз өңір. Облыста мақта-тоқыма кластерін құру бойынша ауқымды жұмыстар жүргізіліп жатыр. Мақта саласындағы негізгі түйіткілді мәселе - баға тұрақсыздығы. Себебі елімізде бәсекеге қабілетті тоқыма және тігін өнеркәсібі дамымағандықтан, шитті мақтаны сату бағасы экспорт нарығына тәуелді болып отыр. Мәселені шешу мақсатында «Мақта шаруашылығын дамытудың және мақта-тоқыма кластерін қолдаудың 2027 жылға дейінгі өңірлік жол картасы» бекітілді. Оған сәйкес 4 бағыта, егістікті әртараптандыру, тұқыммен қамтамасыз ету, жаңа технологияларды енгізу, мақта кластерін құру бойынша ауқымды жұмыс жүргізіледі.

• 18.10.2024
• 92