Облыста мәдениет үйлері көбеюде

Сауран ауданына жұмыс сапары барысында Ескі Иқан ауылындағы күрделі жөндеуден өткізілген «Әмір Темір» атындағы ауылдық мәдениет үйіне барып, құрылыс сапасын тексердім.

Өңірде мәдени ошақтарын қайта ретке келтіріп, ондағы жұмыстарды жандандыруымыз қажет. Жауапты тұлғаларға жергілікті тұрғындардың бос уақытын тиімді пайдалана отырып, үйірмелер мен жоспарлы іс-шараларды тұрақты өткізуді тапсырдым. Соның ішіндегі кітапханаға оқырман тартып, келушілердің қатарын арттыру қажет.

Жалпы Сауран ауданында 11 клуб, 4 мәдениет үйі бар. Мәдениет нысандарының жәй-күйі, олардың сапасы мен саны назардан түспеген. Жұмыстар кезең-кезеңімен атқарылады.  Келесі жылы Қарашық мәдениет үйіне күрделі жөндеу жұмыстарын жүргізу жоспарланып отыр. Сонымен қатар Бабайқорған ауылдық округінің орталығынан клуб әрі кітапхананың құрылысы басталды. Майдантал ауылдық округінің орталығынан да осындай нысанның құрылысын салу үшін тиісті құжаттар әзірленді.

Биыл Түркістан облысында «Ауыл – Ел бесігі» бағдарламасымен 6 мәдениет үйіне күрделі жөндеу жүргізілуде. Оның ішінде Мақтаарал, Шардара, Сайрам мен Сауран аудандарында бір, Жетісай ауданында 2 мәдени нысан бар. Бұдан бөлек, биыл 7 мәдени нысанының құрылыс жұмыстары басталып, оны келесі жылы аяқтау көзделуде.

• 18.10.2024
• 83