Қазақстандық экспортты Польшада ілгерілету туралы

Варшава, 2021 жылдың 10 ақпаны –Қазақстанның Сауда және интеграция вице-министрі Әсел Жанасова мен Польша-Азия сауда-өнеркәсіп палатасының Президенті Януш Пехочинскидің қатысуымен бейнеконференция ұйымдастырылды.

Іс-шара Қазақстанның Польшадағы Елшілігінің бастамасымен өткізіліп, отандық шикізаттық емес экспортты Польшаның және басқа да Орталық және Шығыс Еуропа елдерінің нарықтарына ілгеріту мәселесіне арналған.

Өз сөзінде Қазақстанның Польшадағы Елшісі Әлім Қирабаев Еуропа елдеріне отандық шикізаттық емес экспорттың көлемі мен ауқымын кеңейту бойынша жұмыстың маңыздылығын атап өтті.

Ол осы іс-шара Елшіліктің қазақстандық тауарларды еуропалық нарыққа шығару жөніндегі кешенді жоспарының бір бөлігі ғана екенін мәлімдеді. Осылайша, 2021 жылдың қаңтар айының соңында дипломатиялық өкілдік ҚР Сауда және интеграция министрлігінің басшылығы мен Польшадағы ең ірі онлайн-сауда алаңы «Allegro» компаниясының басшылығының қатысуымен бейнеконференция ұйымдастырды. Осы кездесу нәтижесінде, алдағы уақытта вебинар ұйымдастырылып, оның барысында «Allegro» компаниясының мамандары қазақстандық экспорттаушыларға платформаға тіркелудің мүмкіндіктері мен шарттары туралы айтып береді.

Я.Пехочинский қазақстандық экспорттаушыларға өз өнімдерін алдымен поляк және болашақта басқа еуропалық нарықтарға шығаруға қолайлы жағдай жасау мақсатында бірлескен жұмысты ұйымдастыруды ұсынды. Ол еуропалық лицензиялау жүйесі, сертификаттар мен стандарттарға қойылатын талаптар саласындағы, сондай-ақ поляк нарығында қазақстандық тауарлардың имиджін және логистиканы ілгерілету бойынша еуропалық мемлекеттік органдармен жұмыс істеу бойынша компетенциялар мен тәжірибе алудың маңыздылығын атап өтті.

Қатысушы тараптар көтерілген ұсыныстарды талқылап, қазақстандық өндірушілердің тауарларын Польша нарығына шығару бойынша бірлескен іс-қимыл Жол картасын әзірлеу туралы шешім қабылдады.

• 18.02.2021
• 255