БҚДА мемлекеттік және жекеше операторлардың одан арғы қызметінің орындылығын зерделейді

Мемлекет басшысының тапсырмасы бойынша ҚР Бәсекелестікті қорғау және дамыту агенттігі (Агенттік) мемлекеттік монополия субъектілерінің, мемлекеттік және жекеше операторлардың қызметін жалғастырудың орындылығына талдау жүргізеді.

ҚР Үкіметінің қолдауымен Агенттік күн сайын уәкілетті мемлекеттік органдармен кездесулер өткізеді. Осы тәсілді іске асыру әрбір мемлекеттік орган қызметінің ерекшелігін ескеруге мүмкіндік береді. Атап айтқанда, ҚР Білім және ғылым министрлігімен өткен алғашқы отырыстарда «Ұлттық тестілеу орталығы» РМҚК өкілі компьютерлік тестілеу, оның ішінде ҰБТ-ны өткізу кезінде операторлық қызметті бәсекелі ортаға шығару бойынша Орталықтың жұмысы басталғанын хабарлады. Кеңестердің қорытындылары мемлекеттік органдардың бірінші басшыларының орынбасарлары деңгейінде шығарылады.

БҚДА жүргізген алдын ала талдауға сәйкес операторлардың болуы 39 заңда белгіленген, бұл ретте 94% жағдайда квазимемлекеттік сектор субъектілері (АҚ, ЖШС) және мемлекеттік кәсіпорындар операторлық мәртебеге ие болған. Анықталған 53 оператордың 50-і мемлекеттік оператор. Қалған 3 жағдайда жеке тұлғалар түпкілікті бенефициар болады.

Операторлардың ең көп саны IT, көлік, байланыс және қаржы салаларында қызмет етеді.

Бұдан басқа, елдің тауар нарықтарында заңды түрде мемлекеттік монополияға жатқызылған 17 субъект жұмысын жалғастыруда.

Мемлекеттік органдармен кездесулер кестеге сәйкес 2021 жылдың сәуір айының басына дейін өткізілетін болады.

• 19.02.2021
• 331