МИНИСТР БҰҰ-НЫҢ ШӨЛЕЙТТЕНУГЕ ҚАРСЫ КҮРЕС КОНВЕНЦИЯСЫ ТАРАПТАРЫ КОНФЕРЕНЦИЯСЫНА (COP16 UNCCD) ҚАТЫСТЫ

Қазақстан Республикасының Ғылым және жоғары білім министрі Саясат Нұрбек Сауд Арабиясының Эр-Рияд қаласында өткен БҰҰ-ның құрғақшылық пен жердің шөлге айналу мәселесіне қарсы күрес жөніндегі Конвенциясы тараптары конференциясының (COP16 UNCCD) 16-шы сессиясына қатысты.

Саясат Нұрбек Қазақстанның жер ресурстарын тұрақты басқару саласындағы стратегиялық көзқарасын таныстырып, ғылым мен инновациялық технологиялардың маңыздылығына назар аударды. Министр экожүйелерді қалпына келтіру және климаттық қауіптерді азайтуға ықпал ететін көміртек жобаларын ілгерілету бойынша халықаралық бастамалардағы елдің рөлін ерекше атап өтті. Негізгі назар ғылымның жер ресурстарын тұрақты басқарудың тиімді стратегияларын әзірлеудегі маңызына, экологиялық апаттардың алдын алу үшін жасанды интеллектті қолдануға, құрғақ жерлерді қалпына келтіру жөніндегі халықаралық бастамалардағы Қазақстанның рөліне, сондай-ақ климаттық өзгерістерге бейімделу мен көміртек жобаларын ілгерілетудегі елдің үлесіне аударылды.

Жиын барысында халықаралық бірлескен жобаларды жүзеге асыру, қазақстандық ғалымдардың шетелде тағылымдамадан өтуі және экологиялық зерттеулер саласындағы тәжірибе алмасу мәселелері талқыланды. Форумды қабылдаған Сауд Арабиясы ғылым, технология және экология салаларында Қазақстанның стратегиялық серіктесі ретінде аталды.

• 11.12.2024
• 14