AMANAT партиясы «Қарызсыз қоғам» жобасын іске асыру жұмысының қорытындысын ұсынды

AMANAT партиясы 2024 жылғы «Қарызсыз қоғам» жобасын іске асыру қорытындысын шығарды. 2024 жылы жобаның арқасында 780 мың қазақстандық азамат қаржылық сауаттылығын арттырды. Партияның ақпараты бойынша, қатысушылардың 40%-дан астамы өздерінің борыш жүктемесін төмендетті, 70%-ы ай сайынғы төлемдер сомасын азайтты, 41%-ыкредиттердің жалпы санын азайтты.

Іс-шараға Парламент Мәжілісінің Төрағасы, AMANAT партиясының Төрағасы Ерлан Қошанов, Премьер-Министрдің орынбасары, Ұлттық экономика министрі Нұрлан Байбазаров, Қаржы нарығын реттеу және дамыту агенттігі, мемлекеттік органдардың, екінші деңгейдегі банктердің басшылары, жобаға қатысушылар мен сарапшылар қатысты.

Кездесу барысында халықтың шамадан тыс кредит алуы  қоғамдағы өзекті мәселелердің бірі болып табылатыны атап өтілді. Оны шешу үшін Мемлекет басшысының тапсырмасы бойынша жүйелік шаралар қабылдануда.

Екінші деңгейдегі банктердің қолдауымен іске асырылып жатқан AMANAT партиясының ауқымды «Қарызсыз қоғам» жобасы азаматтардың шамадан тыс кредит алуын азайту және олардың қаржылық сауаттылығын арттыру жөніндегі шаралардың біріне айналды. Оны іске асыру үшін Қаржы нарығын реттеу және дамыту агенттігі Үкіметпен және AMANAT партиясымен бірлесіп Жол картасын әзірледі.

Оның негізгі бағыттарының бірі азаматтардың проблемалық кредиттерін реттеу болды. Агенттік банктермен және микроқаржы ұйымдарымен бірлесіп Азаматтардың проблемалық кредиттерін реттеу алгоритмін әзірледі. Агенттік банктердің және микроқаржы ұйымдарының халықтың проблемалық кредиттерін реттеу жөніндегі жеке жоспарларының орындалуына бақылау жүргізуде.

Биыл Мәжіліс депутаттарының бастамасы бойынша халықтың борыштық жүктемесінің өсуін шектеу үшін Кредит беру кезінде тәуекелдерді барынша азайту және қарыз алушылардың құқықтарын қорғау мәселелері жөніндегі заң әзірленді, оған Мемлекет басшысы 2024 жылғы 19 маусымда қол қойды. Осы заңнамалық жаңалықтар және реттеушілік сипаттағы шаралар халықтың шамадан тыс кредит алуын одан әрі шектеуге бағытталған.

 Іс-шара барысында жобаны қаржыландыру және қазақстандықтарды оқыту бөлігінде  екінші деңгейдегі 12 банктің (Halyk Bank, ЦентрКредит Банкі, Forte bank, Еуразиялық банк, Freedom Bank, Jusan Bank, Bereke Bank, Bank RBK, Nurbank, Home Credit Bank, Altyn Bank)  елеулі рөлі мен қатысуы атап өтілді.

Кездесу соңында серіктестерге, сарапшыларға және жоба қатысушыларына алғыс хаттар мен естелік наградалар тапсыру рәсімі өтті.

• 20.12.2024
• 71