Мемлекет басшысының бастамасымен жүзеге асырылып жатқан ұлттық жоба аясында салынған 6 жайлы мектеп ашылды.

1200 орындық мектептер “Тұран-2”, “Жаңа Тұрлан”, “Ұлағат” шағынауданында және 276-шы орамда, 2000 орындық мектеп “Бозарық” шағынауданында, ал 600 орындық мектеп “Ақжар” шағынауданында пайдалануға берілді. Осымен биыл ашылған жайлы мектептердің жалпы саны 11-ге жетіп, 16 мың оқушы орны құрылды.

Бұл мекемелер ерекше қажеттілігі бар балалар үшін керек барлық жабдықтармен қамтамасыз етілген. Оның ішінде пандус, лифт және арнайы аймақтар бар. Балалардың шығармашылық дамуы мен демалысы үшін коворкинг-аймақтар қарастырылған. Сондай-ақ, оқушылардың қауіпсіздігін қамтамасыз ету мақсатында бейнебақылау камералары мен турникет орнатылған.

Мұғалімдер бос орындарға орналасу конкурсы өткізілгеннен кейін жұмысқа кіріседі. Ал басқа білім беру мекемелерінен оқушылар мен мұғалімдерді ауыстыру бойынша арнайы комиссия құрылатын болады.

• 06.01.2025
• 78