Азық-түлік келісімшарт корпорациясы шағын және орта шаруашылықтарды қолдау, сондай-ақ экспорт географиясын кеңейту бойынша жұмысын күшейтеді

2024 жылы Азық-түлік келісімшарт корпорациясы Мемлекет басшысының тапсырмаларын жүзеге асыруға, соның ішінде шағын және орта фермерлік шаруашылықтарға қолдау көрсетуге және экспорт географиясын кеңейтуге күш салды.

Отандық ауыл шаруашылығы өнімдерін шетелдік нарықтарға шығару үшін шағын астық партияларын біріктіру жобасы сыналды. Жоба аясында Қытай мен Орталық Азия елдеріне дәнді және майлы дақылдарды жеткізу бойынша жалпы сомасы 20 миллион АҚШ долларын құрайтын 6 экспорттық келісімшарт жасалды. Экспорттан түскен барлық табыс шаруалар мен шағын трейдерлерге бағытталады. Бұл табысты тәжірибе биыл да жалғасады.

2024 жылы форвардтық сатып алу бағдарламасы толықтырылып, 324 агроқұрылымды қаржыландыруға мүмкіндік берілді. Пилоттық жобаның қатысушыларына ауыл шаруашылығы өндірушілері, қайта өңдеу зауыттары және мемлекеттік оператор кірді. Фермерлер күнбағыс егу үшін қаражат алып, өнімді жинағаннан кейін шикізатты қайта өңдеу зауытына жеткізуге міндеттелді. Нәтижесінде күнбағыс майы мемлекеттік операторға нарықтық бағадан төмен арнайы бағамен беріледі, ал Азық-түлік келісімшарт корпорациясы майды төмендетілген бағамен ӘКК-ге сатады.

2025 жылдың басында күнбағыс майының алғашқы партиясы өңірлерге жөнелтіледі деп күтілуде. Қазіргі уақытта осыған ұқсас принцип бойынша күріш пен қарақұмық сатып алу мәселесі қарастырылуда.

Мемлекет басшысының тапсырмасы аясында ауыл шаруашылығы өндірушілеріне интервенциялық сатып алу арқылы көмек көрсету үшін 10,5 миллиард теңге сомасына астық сатып алуға өтінімдер қабылданды, 52 мың тонна астық жөнелтілді.

Азық-түлік қауіпсіздігін қамтамасыз ету және астық нарығындағы бағаларды тұрақтандыру мақсатында 2024 жылы 613 мың тонна астыққа келісімшарт жасалды, оның ішінде 407,5 мың тоннасы қазірдің өзінде жеткізілді.

Экспорт мүмкіндіктерін кеңейту және астықтың кепілді өткізілуін қамтамасыз ету үшін Продкорпорация ірі қытайлық корпорациялармен ынтымақтастықты тереңдету жұмыстарын жалғастырды. COFCO агрохолдингімен дәнді және майлы дақылдарды жеткізу бойынша үш жылдық келісімшарт жасасу туралы келісімдерге қол жеткізілді. Jiangsu SOHO Holdings Group компаниялар тобымен 200 мың тонна қазақстандық жемдік арпаны жеткізуге негіздемелік келісімшартқа қол қойылды. Citic Group өкілдерімен Қазақстан аумағында дәнді және майлы дақылдарды терең өңдейтін зауыт салу перспективалары талқыланды. Акмола облысында Dalian Hesheng Holdings қытайлық көпсалалы холдингімен бірлесіп тағы бір қайта өңдеу кешенін салу жоспарлануда. Азық-түлік келісімшарт корпорациясы мемлекеттік оператор ретінде зауытты тиеу үшін қазақстандық ауыл шаруашылығы өндірушілерінің тұрақты астық жеткізілуін қамтамасыз етуге дайын. Алғашқы кезеңде зауыт жылына 1 миллион тонна бидайды қайта өңдейтін болады деп күтілуде.

Азық-түлік келісімшарт корпорациясы ұзақ уақыттан бері алғаш рет Қазақстанның жеке компанияларымен қатар Иранға арпа жеткізуді жолға қойды, 30 мың тоннаға экспорттық келісімшарт жасалды. Сондай-ақ, астық операторы Орталық Азия елдеріне мемлекеттік азық-түлік резервін толықтыруға арналған өсімдік шаруашылығы өнімдерін жеткізуді жалғастырды.

2025 жылы Азық-түлік келісімшарт корпорациясы стратегиялық міндеттерді шешуге, соның ішінде шағын және орта фермерлік шаруашылықтарға қолдау көрсетуге және экспорт географиясын кеңейтуге назар аударады.

• 08.01.2025
• 74