Қазақстанның барлық аймақтарында Қаржылық мониторинг агенттігінің қызметкерлері қаржылық қауіпсіздік бойынша сабақтар өткізуде

2022-2026 жылдарға арналған қаржылық мониторингті дамыту Концепциясын жүзеге асыру аясында Агенттік Білім және ғылым министрлігімен бірлесіп, қаржылық қауіпсіздік бойынша ақпараттық акцияны бастады. Осы мақсатта Ұлттық білім академиясымен келісілген 3 сыныптан тыс ашық сабақ жобасы әзірленді.

5-7 сынып оқушылары үшін цифрлық гигиена ережелері интерактивті және ойын форматында түсіндірілуде.

8-9 сынып оқушылары үшін алаяқтық сайттарды және ұсыныстарды анықтау дағдылары үйретілуде.

10-11 сынып оқушыларына «дроппер» түсінігі, осы қызметпен байланысты тәуекелдер және алаяқтық схемаларға тартудың басқа түрлері туралы арнайы түсіндірме берілуде. Қазіргі уақытта қаржылық қауіпсіздік сабақтары еліміздің 2 800 мектептерінде, 567 мыңнан астам оқушыны қамтып өткізілді.

Оның ішінде Агенттік қызметкерлерінің қатысуымен 183 оқу орнында өткізілді.

Бұл бастаманың мақсаты – жасөспірімдер арасында құқықтық жауапкершілікті қалыптастыру және цифрлық кеңістікте қауіпсіз мінез-құлық дағдыларын дамыту.

Агенттік жас ұрпақ арасында цифрлық қауіпсіздік мәселелеріне жауапкершілікпен қарауды қалыптастыру мақсатында «Заң мен тәртіп» принципін алға тартып, превентивті жұмыстарын жалғастыруда.

• 03.02.2025
• 33