Қазақстан мен Әзербайжан арасындағы ауыл шаруашылығы саласындағы ынтымақтастық жөніндегі Жұмыс тобының отырысы өтті

Жұмыс тобының алғашқы отырысы бейнеконференция форматында өтті. Оған Қазақстан Республикасы Ауыл шаруашылығы министрлігі мен Әзербайжан Республикасы Ауыл шаруашылығы министрлігінің өкілдері қатысты.

Қазақстан Республикасы Ауыл шаруашылығы вице-министрі Ермек Кенжеханұлы мен Әзербайжан Республикасы Ауыл шаруашылығы министрінің орынбасары Эльчин Разим оғлы Зейналов аграрлық сектордағы екіжақты ынтымақтастықты дамытудың маңыздылығын атап өтті. Олар Жұмыс тобының құрылуы өзара іс-қимылды күшейтуге және ынтымақтастықтың нақты бағыттарын айқындауға бағытталғанын айтты.

Тараптар Қазақстан мен Әзербайжан арасындағы ауыл шаруашылығы өнімдері саудасының көлемін ұлғайту мүмкіндіктерін талқылады. 2024 жылы тауар айналымының 2023 жылмен салыстырғанда 5,6%-ға өсіп, 78,6 млн АҚШ долларына жеткені атап өтілді. Қазақстандық экспорт 64,2 млн АҚШ долларын (жалпы тауар айналымының 81,6%-ын) құрады. Баку астық терминалының әлеуетін пайдалана отырып, Қазақстаннан Әзербайжанға жеткізілген астық көлемі 1,5 млн тоннаға дейін артты.

Сонымен қатар, Қазақстаннан Әзербайжанға ауыл шаруашылығы жануарларының асыл тұқымды материалы (ұрығы) жеткізілуінің болашағы талқыланды.

Кездесуге қатысушылар ауыл шаруашылығы дақылдарының тұқымдарымен алмасу, экологиялық сұрыптық сынақтар жүргізу, ғылыми конференцияларға қатысу, сондай-ақ екі елдің аграрлық жоғары оқу орындары арасында бірлескен білім беру бағдарламалары мен қос дипломды білім беруді дамыту мәселелеріне қызығушылық білдірді.

Отырыс қорытындысы бойынша тараптар ауыл шаруашылығы саласындағы ынтымақтастықты одан әрі дамыту, нақты жобаларды жан-жақты пысықтау және жоспарланған бастамаларды іске асыру туралы келісімге келді.

• 04.03.2025
• 36