С. Сейфуллин атындағы ҚАЗАТЗУ мен ФАО тұрақты агроазық-түлік жүйелерін дамыту бойынша ынтымақтастық туралы меморандумға қол қойды

ФАО бас директорының орынбасары, Еуропа және Орталық Азия бойынша өңірлік өкілі Виорел Гуцу С. Сейфуллин атындағы Қазақ агротехникалық зерттеу университетіне іссапармен келді.

Тараптар тұрақты ауыл шаруашылығы, климаттың өзгеруіне бейімделу және аграрлық секторды цифрландыру салаларында бірлескен жұмысқа жаңа мүмкіндіктер ашатын ынтымақтастық пен әріптестікті нығайту жөніндегі меморандумға қол қойды. Халықаралық ынтымақтастықты дамытудағы және ҚАЗАТЗУ-ның ғылыми-білім беру әлеуетін арттырудағы бұл маңызды қадам Қазақстанда ауыл шаруашылығының тұрақты дамуына ықпал етіп, ФАО-ның жаһандық стратегиялық мақсаттарына сәйкес келеді.

ФАО-ның 2022-2031 жылдарға арналған стратегиялық шеңберлік бағдарламасы төрт негізгі мақсатқа қол жеткізуге бағытталған: өндірісті, тамақтануды, қоршаған ортаны және өмір сүру сапасын жақсарту. ФАО-ның кешенді тәсілі агроазық-түлік жүйелерінің экономикалық, әлеуметтік және экологиялық аспектілерінің өзара байланысын ескере отырып, ауыл шаруашылығының тұрақты дамуына ықпал етеді.

Сапар аясында университет базасында ФАО бұрышының ашылу рәсімі өтті. Бұл білім беру орталығы студенттер мен профессорлық-оқытушылық құрамның кәсіби дағдыларын дамытуға арналған алаңға айналады.

Тараптар ФАО бұрышының ашылуы білім беру мен ауыл шаруашылығының тұрақты дамуы саласындағы инновациялық тәсілдерді көрсететін заманауи материалдарды таратуға, білім алмасуға және оқыту іс-шараларын өткізуге арналған бірегей кеңістік болатынын атап өтті.

• 06.03.2025
• 60