Светлана Жақыпова Қазақстан әйелдерін 8 наурыз мерекесімен құттықтады

Қазақстан Республикасының Еңбек және халықты әлеуметтік қорғау министрі Светлана Жақыпова Халықаралық әйелдер күнімен барша қыз-келіншектерді құттықтап, оларға зор денсаулық, бақ-береке тіледі.

«Құрметті арулар, сіздерді 8 наурыз мерекесімен шын жүректен құттықтаймын!

Бір қолымен бесікті, екінші қолымен әлемді тербететін нәзік жанды аруларымыз отбасының ұйытқысы, тыныштықтың шырақшысы.

Еліміздің еңбек, әлеуметтік қорғау және көші-қон саласында қызмет етіп жүрген әйел азаматтар жас баладан бастап үлкендерімізге дейін қамқор болып, олардың игілігі үшін жанқиярлықпен еңбек етуде. Біздің әйел қызметкерлеріміздің парасаттылығы, төзімділігі және мейірбандығы адамдарды қиын өмірлік жағдайлардан шығаруда жәрдемдесіп, олардың өмір сапасын көтеру мен кезіккен мәселелерін оңтайлы шешудегі рөлі ерекше екені анық.

Шуақты көктем баршаңызға қуаныш пен мерекелік көңіл-күй сыйлап, асқақ армандарыңыз орындала берсін!  Қай салада қызмет атқарсаңыз да, жоғары жетістіктер мен жақсы нәтижелерге жетулеріңізді тілеймін. Өмірлеріңізде жақсылық мол болып, айналаңыздағы адамдар сіздерді жан жылулығымен жадырата берсін. Барлық уақытта бақытқа кенеліп, әрдайым жақындарыңыз бен әріптестеріңіздің құрмет-қошеметіне бөлене беріңіздер.

Барша аруларымызға, ардақты аналарымызға, қыздарымыз бен әпке-сіңілілерімізге зор денсаулық, бақыт, шаттық пен бақ-береке тілеймін!» – делінген Светлана Жақыпованың құттықтау сөзінде.

• 07.03.2025
• 48