ҚР АШМ мен ҚХР АӨК тауар айналымының көлемін арттыру үшін күш біріктіруге келісті

Бүгін Астанада Қазақстан Республикасы мен Қытай Халық Республикасы арасындағы Ынтымақтастық комитеті аясында ауыл шаруашылығы саласындағы ынтымақтастық жөніндегі кіші комитеттің алғашқы отырысы өтті.

Видеоконференция форматында ҚР Ауыл шаруашылығы вице-министрі Ермек Кенжеханұлы мен ҚХР Ауыл шаруашылығы және ауыл істері вице-министрі Чжан Чжили аграрлық саладағы екіжақты ынтымақтастықтың маңызды мәселелерін талқылады.

Атап айтқанда, сауда-экономикалық өзара іс-қимыл және екі елдің ауыл шаруашылығы өнімдерінің нарыққа қолжетімділігі мәселелері өзекті болып қала беруде.

Тараптар ауыл шаруашылығы саласындағы екіжақты сауда көлемінің оң динамикасын атап өтті. 2024 жылы екі ел арасындағы ауыл шаруашылығы өнімдерінің тауар айналымы 10,5%-ға өсіп, 1,4 миллиард АҚШ долларын құрады. Бұл ынтымақтастықтың өсіп келе жатқан әлеуетін және өзара байланыстарды одан әрі тереңдету қажеттілігін растайды.

Талқылаудың негізгі бағыты ауыл шаруашылығы ғылымы мен технологиялары саласындағы ынтымақтастық болды. Биофармацевтика және экология сияқты салаларда бірлескен зертханалар құру және инновациялық технологияларды дамыту ұсынылды. Ең маңызды қадам – тәжірибе мен білім алмасу, бұл елдердің аграрлық сектордағы позициясын нығайтуға мүмкіндік береді.

Сондай-ақ, ет, құс еті, қант қызылшасы жомы және картопты қоса алғанда, ауыл шаруашылығы өнімдерінің экспортын кеңейту шаралары қарастырылды. Қазақстандық өнімдердің Қытай нарығына қолжетімділігін жеңілдететін жаңа хаттамаларға қол қою жоспарлануда, бұл екіжақты сауда көлемін едәуір арттыруға мүмкіндік береді.

Ерекше назар шекара маңындағы аймақтарда шегірткемен күрес мәселелеріне аударылды. Отырыстағы қатысушылар бірлескен зерттеулер жүргізуге, тәжірибе алмасуға және фитосанитарлық қауіпсіздікті қамтамасыз ету үшін заманауи әдістерді қолдануға уағдаласты.

• 11.03.2025
• 41