ФАО делегациясы Қазақстандағы ветеринариялық қызметтің жағдайымен танысты

Біріккен Ұлттар Ұйымының Азық-түлік және ауыл шаруашылығы ұйымының (ФАО) өкілдері бруцеллезге бақылау жасауды техникалық қолдау және ветеринариялық бақылауды күшейту жөніндегі миссия аясында Қазақстанға танысу сапарымен келді.

10-14 наурыз аралығында ФАО делегациясы, оның құрамында Еуропа және Орталық Азия бойынша ФАО өңірлік кеңсесінің жетекші сарапшылары – доктор Даниэль Бельтран-Алькрудо мен доктор Чему Бласко болды, еліміздегі бруцеллезге қарсы күрес стратегиясын жетілдіруге бағытталған негізгі іс-шараларға қатысты.

Қазақстан Республикасы Ауыл шаруашылығы министрлігінің Ветеринариялық бақылау және қадағалау комитеті басшылығымен өткен кездесуде ветеринариялық қызметтің қазіргі жағдайы, бруцеллезге қарсы күрес бағдарламалары және әрі қарайғы ынтымақтастықтың келешегі талқыланды.

ФАО сарапшылары ветеринариялық қызметтің әртүрлі деңгейдегі өкілдерімен, ғылыми қауымдастықпен және ветеринариялық препараттар өндірушілерімен бірқатар жұмыс кездесулерін өткізді. Кездесулер барысында бруцеллезге қарсы күрестің қолданыстағы стратегияларының тиімділігі сараланып, елдегі эпизоотиялық жағдайға жан-жақты талдау жүргізілді. Сондай-ақ ветеринариялық бақылау саласындағы тәжірибе алмасу және озық әдістерді енгізу мәселелеріне ерекше көңіл бөлінді.

ФАО делегациясының мүшелері Ақмола облысындағы зертханалар мен Астанадағы республикалық ветеринариялық зертхананы аралап, Қазақстанда қолданылатын бруцеллез диагностикасы әдістерімен танысты және зертханалардың жабдықталу деңгейін бағалады.

Өңірлерде жергілікті фермерлермен және ветеринариялық қызмет мамандарымен кездесулер өтіп, бруцеллездің ерте диагностикасы мен алдын алу шаралары талқыланды. Сондай-ақ ветеринариялық процестерді цифрландырудың маңыздылығы мен оның тиімділігіне ерекше назар аударылды.

• 18.03.2025
• 28