Коллекторлық агенттіктер мен олардың қызметкерлерінің жауапкершілігін арттыру туралы

Ағымдағы жылғы 10 қаңтарда Мемлекет басшысы коллекторлық агенттіктер мен олардың қызметкерлерінің берешекті өндіріп алу кезінде борышкерлермен өзара іс-қимыл жасау тәртібіне қойылатын талаптарды бұзғаны үшін жауапкершілігін күшейтуді көздейтін «Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы» ҚР Заңына қол қойды.

Құқық бұзушылықтың алдын алу, сондай-ақ коллекторлық қызметті жүзеге асыру кезінде жосықсыз әрекеттер жасағаны үшін коллекторлық агенттіктердің жауапкершілігін арттыру мақсатында айыппұлдардың мөлшері 2 есеге ұлғайды (ҚР ӘҚтК 211-1-бабының бірінші бөлігі):

- шағын кәсіпкерлік субъектілері үшін – 100 АЕК-тен 200 АЕК-ке дейін,

- орта кәсіпкерлік субъектілері үшін – 200 АЕК-тен 400 АЕК-ке дейін,

- ірі кәсіпкерлік субъектілері үшін – 300 АЕК-тен 600 АЕК-ке дейін.

Сонымен бірге коллекторлық агенттіктердің коллекторлық қызметті жүзеге асыру қағидаларын бұзғаны үшін айыппұлдардың мөлшері шағын кәсіпкерлік субъектілері үшін 50 АЕК-тен 100 АЕК-ке дейін, орта кәсіпкерлік субъектілері үшін 100 АЕК-тен 200 АЕК-ке дейін және ірі кәсіпкерлік субъектілері үшін 150 АЕК-тен 300 АЕК-ке дейін ұлғайтылды (ҚР ӘҚтК 211-1-бабының екінші бөлігі).

Бұдан басқа, ҚР ӘҚтК-нің 211-1-бабы борышкерлермен және (немесе) олардың өкілдерімен өзара іс-қимыл жасау кезінде жосықсыз әрекеттер жасағаны үшін коллекторлық агенттіктер қызметкерлерінің дербес жауапкершілігін енгізуді көздейтін құқық бұзушылықтың жаңа құрамымен толықтырылды. Осы бұзушылық бойынша айыппұл мөлшері 30 АЕК мөлшерінде белгіленген.

Бұл нормалар 2025 жылғы 13 наурыздан бастап қолданысқа енгізілді.

• 03.04.2025
• 39