ҰЛТТЫҚ ЖЕКЕШЕЛЕНДІРУ КЕҢСЕСІ МЕМЛЕКЕТТІК МЕНШІККЕ ИЕЛІК ЕТУ САЯСАТЫН БЕКІТУДІ ҰСЫНАДЫ

Ұлттық Жекешелендіру Кеңсесінің жұмысы орталық мемлекеттік органдар мен жергілікті атқарушы органдардың қызметіндегі бірқатар жүйелі мәселелерді анықтады. Бұл проблемалар жекешелендіру және мемлекеттің экономикадағы үлесін азайту жөніндегі жүргізіліп жатқан жұмысқа кері әсерін тигізуде. Бұл туралы Бәсекелестікті қорғау және дамыту агенттігінің төрағасы Марат Омаров Кеңсенің IX  отырысында мәлімдеді.

«Көптеген органдар жекешелендірудің мақсаты мен оның әсерін түсінбейді және қызығушылық танытпайды. Бұл ретте реттеушілік шешімдер мен әлеуметтік міндеттемелер де назардан тыс қалып отыр», – деді Омаров.

Ол орталық мемлекеттік және жергілікті атқарушы органдар тарапынан бастаманың болмауы, сондай-ақ қазіргі кездегі нарыққа сай емес бағалар мен артық субсидиялау мәселелерін негізгі проблемалар ретінде атап өтті. Бұл, ең алдымен, мұнай, мұнай өнімдері, газ, электр энергиясы өндірісі, сумен жабдықтау, теміржол көлігі және басқа да салаларға қатысты.

«Қазіргі уақытта елде мемлекеттік компаниялар, әсіресе ұлттық холдингтердің рөлі мен қызметіне қатысты нақты түсініктеме жоқ. Осыған байланысты, ЭЫДҰ (OECD) қағидаттары мен ұсынымдарына сәйкес, мемлекеттік меншікке иелік ету саясатын бекітуді ұсынамыз», – деп атап өтті Омаров.

Мұндай саясат белгілі бір мемлекеттік меншіктің қажеттілігін нақты негіздеуді қамтуы тиіс. Сонымен қатар, онда мемлекеттің экономикаға араласу қағидаттары мен тәсілдері, кейбір секторларда меншік құқығы қарастырылуы қажет. Сондай-ақ, саясат мемлекеттік активтерді басқарудың ашықтығын қамтамасыз ететін басқарушы органдардың рөлін айқындауы және экономиканың стратегиялық мүдделерін ескеруі керек.

Ұлттық Жекешелендіру Кеңсесі 2024 жылғы 28 мамырда Президенттің «Экономиканы ырықтандыру шаралары туралы» Жарлығы аясында құрылды.

• 07.04.2025
• 40