Түркістан облысында шегірткеге қарсы күрес шаралары басталды

2025 жылы шегірткеге қарсы фитосанитарлық іс-шараларды өткізу бойынша жедел штаб отырысы Түркістан облысында өтті. Жиынға ҚР АШМ АӨК мемлекеттік инспекция комитеті төрағасының м.а. Сакен Каныбеков қатысты.

Кеңес барысында өңірде шегірткемен күресу үшін қабылданып жатқан шаралар талқыланды. Шегірткенің таралуы тіркелген 9 ауданда 65 жұмыс тобы құрылып, профилактикалық және жедел әрекеттерді қамтитын егжей-тегжейлі іс-шаралар жоспары әзірленді.

Жағдайға мониторинг жүргізуге штаттық мамандар мен жергілікті атқарушы органдардың қызметкерлерін қосқанда мыңнан астам адам жұмылдырылған.

Шегіртке дернәсілдерінің алғашқы жер бетіне шығуы биыл 3 сәуірде тіркелді. Олардың әрі қарай таралуының алдын алу мақсатында бекітілген жоспарға сәйкес химиялық өңдеу жұмыстары басталды.

Жалпы, 2025 жылы Қазақстанда шегірткенің таралуы 2,1 млн гектар аумақты қамтиды деп болжануда. Қорғау шараларын жүргізу үшін мердігер ұйымдармен келісімшарттар жасалып, кешенді қызметтер сатып алынды. Барлығы 443 бүріккіш техника жұмылдырылмақ. Оның ішінде Түркістан облысына 58 жерүсті бүріккіш, 4 ұшақ және 2 ұшқышсыз авиациялық жүйе тиесілі. Барлық техникалық құралдар қажетті техникалық тексеруден өтіп, жұмысқа дайын. Олар нақты жағдайға байланысты іске қосылады.

Шегірткеге қарсы күрес шаралары ҚР АШМ АӨК мемлекеттік инспекция комитетінің бақылауында.

• 10.04.2025
• 33