Қарағанды облысында көктемгі егіс жұмыстары 10 мамырда басталады

Өңір 2025 жылдың көктемгі егіс маусымына сенімді түрде қадам басып отыр — егіс алқаптарының ұлғаюы, техникалық дайындықтың жоғары деңгейі және ауыл шаруашылығы өндірушілеріне көрсетілетін қолдаудың кеңеюімен ерекшеленеді.

2025 жылға арналған болжамды егіс алқаптарының құрылымы 1,2 млн гектарды құрайды, бұл өткен жылмен салыстырғанда 41,6 мың гектарға артық. Егіс алқаптарын әртараптандыру жоспарына сәйкес, мал азығы және майлы дақылдар егілетін жер көлемі артады.

Атап айтқанда, дәнді дақылдар 957 мың гектарға, майлы дақылдар 46,7 мың гектарға (13,8 мың гектарға артқан), мал азығы дақылдары 171,6 мың гектарға, картоп 16 мың гектарға, көкөністер 2 мың гектарға егіледі.

Қазіргі таңда 109,4 мың тонна дәнді дақылдар, 0,7 мың тонна майлы, 7 мың тонна мал азығы дақылдарының және 36 мың тонна картоп тұқымы дайындалды. Тексерілген 85,2 мың тонна тұқымның 94%-ы талаптарға сәйкес келеді.

Топырақтың құнарлылығын арттыру үшін 93 мың тонна минералды тыңайтқыш енгізу жоспарланған (ғылыми негізделген қажеттіліктің 62%-ы).

Көктемгі дала жұмыстарына 17,3 мың тонна арзандатылған дизель отыны бөлінді, литрі 250 теңгеден.

Егіс жұмыстарына 10,5 мың трактор, 229 егіс кешені, 4,4 мың тұқым сепкіш және 9,7 мың басқа да ауыл шаруашылығы техникасы жұмылдырылады.

Мемлекеттік қолдау аясында көктемгі егіс жұмыстарын жүргізуге 5 млрд теңге қарастырылған. Оның ішінде тұқым шаруашылығына — 600,5 млн теңге, пестицидтер сатып алуға — 2,3 млрд теңге, су жеткізу қызметтеріне — 148,2 млн теңге, тыңайтқыштарға — 2 млрд теңге бөлінді.

«Кең дала» бағдарламасы аясында 149 шаруашылық 6,29 млрд теңге көлемінде қаржыландырылды.

• 16.04.2025
• 37