Қазақстан Республикасының Қаржылық мониторинг агенттігі өкілдерінің Еуропа Кеңесінің делегатымен екіжақты кездесуі өтті.

Агенттік Төрағасының орынбасары Жеңіс Елемесов ұзақ жылғы нәтижелі ынтымақтастық үшін алғысын білдіріп, қылмыстық жолмен алынған кірістерді жылыстатуға және терроризмді қаржыландыруға қарсы іс- қимылдың (АЖ/ТҚҚ) ұлттық жүйесін одан әрі дамыту жолдарын талқылады.

Сондай-ақ, Астана қаласында Халықаралық форум өтті. Форум аясында 50-ден астам тақырыптық сессия ұйымдастырылып, әртүрлі елдерден келген ондаған сарапшы баяндама жасады. «Зияткерлікті ұштастыра отырып – болашақты қалыптастырамыз» атты ортақ тақырып аясында қатысушылар қазіргі заманның басты жаһандық сын-қатерлерін талқылады.

«Экономикалық қылмыстармен күрестегі ынтымақтастық» сессиясы шеңберінде Жеңіс Елемесов Еуропа Кеңесімен бірлескен өзара іс-қимылдың негізгі бағыттарын таныстырып, тәжірибе алмасудың маңыздылығын атап өтті.

Сонымен қатар, әдістемелік қолдауды күшейту, талдамалық құралдарды дамыту және мамандарды даярлау бойынша басымдықтарды қамтитын техникалық көмек жобасы секілді жаңа бастамалар көтерілді. Форум мен екіжақты кездесу қаржы жүйесінің қауіпсіздігін нығайту мен әріптестікті дамытуға арналған маңызды алаңға айналды.

• 03.06.2025
• 20